ఎంతగా ఉద్రిక్తతలు ఉన్నా… పాక్ ఎన్ని కుయుక్తులు పన్నుతున్నా.. సాధారణ పౌరుల విషయంలో శాంతి సామరస్యాలకే భారత ఆర్మీ ముందుంటుందని నిరూపించింది. ఉగ్రవాదం పైనే పోరాటం కానీ.. పాకిస్థాన్ ప్రజలపై కాదని ప్రపంచానికి చాటింది.
పాక్ నుంచి ఓ పౌరుడు పొరబాటున సరిహద్దు దాటితే.. క్షేమంగా తిప్పి పంపింది భారత సరిహద్దు భద్రతా దళం (బీఎస్ఎఫ్). కశ్మీర్ లోని సాంబా జిల్లా రామ్ గఢ్ ప్రాంతంలోని అంతర్జాతీయ సరిహద్దు గుండా శుక్రవారం ఓ పాకిస్థాన్ పౌరుడు.. భారత్ లోకి వచ్చాడు. అతడిని అదుపులోకి తీసుకుని విచారించిన బీఎస్ఎఫ్.. పొరబాటున సరిహద్దు దాటిన పాకిస్థానీగా నిర్థారించుకుంది. శాంతి సామరస్యాలకు సూచికగా అతడిని శనివారం మధ్యాహ్నం 3.40 గంటల సమయంలో తిప్పి పాక్ రేంజర్లకు అప్పగించారు బీఎస్ఎఫ్ జవాన్లు.
