- ఇప్పటికే 35.96 లక్షల టన్నుల వడ్లు కొనుగోలు
- అందులో 35.40 లక్షల టన్నులు మిల్లులకు తరలింపు
- రైతుల ఖాతాల్లో రూ.6,689 కోట్లు జమ చేసిన సర్కారు
హైదరాబాద్, వెలుగు: రాష్ట్రంలో ధాన్యం కొనుగోళ్లు వేగంగా సాగుతున్నాయి. గతంలో సరిపడ లారీలు లేక, ఇన్టైంలో అన్లోడ్కాక రైతులు వడ్ల కుప్పలవద్ద వారాలకొద్దీ పడిగాపులు కాసేవారు. కానీ, ప్రస్తుతం కాంటా అయిన ధాన్యాన్ని వెంటవెంటనే సమీప మిల్లులకు తరలించేందుకు సరిపడా లారీలను ఏర్పాటు చేయడంతో ఆటంకాలు లేకుండా కొనుగోళ్లు సాగుతున్నాయి.
ఇప్పటిదాకా కొనుగోలు చేసిన 35.96 లక్షల టన్నుల్లో 35.40లక్షల టన్నుల(56 వేల టన్నులు మినహా)ను మిల్లులకు తరలించడం చూస్తే రవాణాలో జాప్యం లేనట్లు స్పష్టమవుతున్నది. కాగా, ఒక్కో లారీలో 25టన్నుల చొప్పున 1.42లక్షల ట్రిప్పుల వడ్లను మిల్లులకు చేర్చినట్లు పౌరసరఫరాలశాఖ ప్రకటించింది.
శుక్రవారం నాటికి రాష్ట్రవ్యాప్తంగా 8,361 కేంద్రాల్లో కొనుగోళ్లు సాగుతున్నాయి. మొత్తంగా 6.13లక్షల మంది రైతుల నుంచి 35.96లక్షల టన్నుల వడ్లను సర్కారు కొనుగోలు చేసింది. ఇందులో 16.80లక్షల టన్నుల సన్నవడ్లు, 19.16లక్షల టన్నుల దొడ్డువడ్లు ఉన్నాయి. రైతుల ఖాతాల్లో ఇప్పటి వరకు రూ.6,689 కోట్లు జమ చేసింది. ఇందులో సన్నవడ్లకు బోనస్ రూపంలో రూ.314 కోట్లు అందించింది. గతేడాది ఇదే టైంకు 29లక్షల టన్నులు మాత్రమే సేకరించారు.
టెలీకాన్ఫరెన్స్ ద్వారా రోజూ సమీక్ష
సివిల్ సప్లయ్స్ మంత్రి, అధికారులు టెలికాన్ఫరెన్స్‌‌‌‌‌‌‌‌ల ద్వారా ధాన్యం కొనుగోళ్లను ఎప్పటికప్పుడు పర్యవేక్షిస్తున్నారు. సివిల్ సప్లయ్స్ కమిషనర్ ప్రతి రోజు ఉదయం 9గంటలకు రాష్ట్రవ్యాప్తంగా అధికారులతో టెలీకాన్ఫరెన్స్ నిర్వహించి సమీక్షిస్తున్నారు. రోజుకు లక్ష టన్నులకు పైగా కొనుగోళ్లు జరుగుతున్నాయి. ఈసారి కొనుగోళ్లు ప్రారంభించిన 59 రోజుల్లోనే 36లక్షల టన్నులకు చేరువ కావడం గమనార్హం.
అన్నీ రికార్డులే.
గత రికార్డులను తిరగరాస్తూ రాష్ట్రంలో ఈ వానాకాలంలో 67.88 లక్షల ఎకరాల్లో వరి సాగైంది. 1.48 కోట్ల టన్నుల ధాన్యం దిగుబడి వస్తుందని వ్యవసాయ శాఖ అంచనా వేసింది. ఇందులో సర్కారు 80 లక్షల టన్నులు కొనుగోలు చేయాలని నిర్ణయించింది. ఈ నేపథ్యంలో 80లక్షల టన్నులు కొనుగోళ్లు చేయాలని రాష్ట్ర సర్కారు నిర్ణయించింది.. ఈ వానాకాలం సీజన్లో ధాన్యం కొనుగోళ్ల కోసం రాష్ట్ర సర్కారు రూ.22వేల కోట్లు ఖర్చు చేసేందుకు సిద్ధమైంది. ఇందులో ఇప్పటికే రూ.6,689కోట్లకు పైగా రైతుల ఖాతాల్లో జమ చేసింది.
