నేషనల్ హైవేలకు బూస్ట్.. రెండు కీలక ప్రాజెక్టులకు కేంద్రం ఆమోదం

• రూ.20 వేల కోట్లతో నిర్మాణ పనులు
• నాసిక్–సోలాపూర్–అక్కల్​కోట్ హై స్పీడ్ కారిడార్ 
• ఒడిశాలోని ఎన్​హెచ్ 326 విస్తరణ పనులు

న్యూఢిల్లీ: దేశవ్యాప్తంగా రవాణా వ్యవస్థను మెరుగుపరచడానికి సుమారు రూ.20,668 కోట్ల విలువైన 2 కీలక హైవే ప్రాజెక్టులకు కేంద్రం ఆమోదం తెలిపింది. నాసిక్ – సోలాపూర్ – అక్కల్​కోట్ హై స్పీడ్ కారిడార్ నిర్మాణానికి మంత్రివర్గం గ్రీన్ సిగ్నల్ ఇచ్చింది. అదేవిధంగా, ఒడిశాలోని ఎన్​హెచ్ 326ను మరింత విస్తరించేందుకు అంగీకరించింది. ప్రధానమంత్రి నరేంద్ర మోదీ అధ్యక్షతన మంగళవారం కేబినెట్ భేటీ అయింది. ఈ సందర్భంగా మంత్రివర్గం తీసుకున్న నిర్ణయాలను కేంద్ర మంత్రి అశ్వినీ వైష్ణవ్ మీడియాకు వెల్లడించారు. నాసిక్–సోలాపూర్ 6 లేన్ కారిడార్ అనేది సూరత్ – చెన్నై హై-స్పీడ్ కారిడార్‌‌లో భాగంగా ఉంటుంది. 

374 కిలో మీటర్ల 6 లేన్ గ్రీన్ ఫీల్డ్ కారిడార్ కోసం రూ.19,142 కోట్లు ఖర్చు చేయనుంది. ఈ హైవే నిర్మాణం పూర్తయితే జర్నీ టైమ్​ సగం తగ్గనున్నది. ఇప్పుడు 31 గంటల టైమ్ పడుతోంది. అదే 6 లేన్ గ్రీన్​ఫీల్డ్ కారిడార్ కంప్లీట్ అయితే 201 కి.మీ తగ్గి.. 17 గంటల్లోనే గమ్యం చేరుకోవచ్చు. నాసిక్, అహిల్యానగర్, సోలాపూర్ వంటి నగరాలను కలుపుతూ చివరకు ఆంధ్రప్రదేశ్‌‌లోని కర్నూలు వరకు కనెక్ట్​ అవుతది.

కర్నూల్, కడప మీదుగా నేషనల్ హైవే

చెన్నై–సూరత్ కారిడార్ నిర్మాణంలో భాగంగా కర్నూల్, కడప మీదుగా జాతీయ రహదారి వెళ్లనున్నది. చెన్నై పోర్టు, హజీరా పోర్టుకు కనెక్టివిటీ పెరగనున్నది. కొప్పర్తి, ఓర్వకల్ ఇండస్ట్రియల్ కారిడార్లకు ఈ హై స్పీడ్ నెట్‌‌వర్క్‌‌ ఉపయోగపడనున్నది. రెండో హైవే ప్రాజెక్ట్​లో భాగంగా ఒడిశాలోని మోహన నుంచి కోరాపుట్ వరకు ఉన్న 2 లేన్ల హైవేను మరింత వెడల్పు చేస్తారు. సుమారు 206 కిలోమీటర్ల హైవే విస్తరణకు రూ.1,526 కోట్లు ఖర్చు చేయనున్నారు.  

ఇది గజపతి, రాయగడ, కోరాపుట్ వంటి గిరిజన ప్రాంతాలకు రవాణా సౌకర్యాన్ని మెరుగుపరుస్తుంది. అలాగే, ఆంధ్రప్రదేశ్‌‌లోని చింతూరు వద్ద ఎన్​హెచ్30తో కలుస్తుంది. దీనివల్ల పొరుగు రాష్ట్రాలతో సంబంధాలు మెరుగుపడతాయి. కాగా, 2024, జూన్ నుంచి రైల్వే, హైవే, మెట్రో, వివిధ మౌలిక వసతుల ప్రాజెక్టులకు భారీ ఎత్తున నిధులను కేంద్ర ప్రభుత్వం కేటాయించింది. రూ.12.6 లక్షల నిధులను కేబినెట్‌‌ అలకేట్​ చేసిందని మంత్రి చెప్పారు.