అమెరికా అధ్యక్షుడు డొనాల్డ్ ట్రంప్ గతంలో H1 B వీసాలపై నిషేధం విధిస్తూ నిర్ణయం తీసుకున్నారు. ఆఉత్తర్వులపై అమెరికాలోని నార్తర్న్ కాలిఫోర్నియా కోర్టు తీర్పు వెలువరించింది. హెచ్1బీ వీసాలపై నిషేధాన్ని తొలగించాలంటూ కోర్టు ఆదేశాలు జారీ చేసింది. ట్రంప్ చర్యలు రాజ్యాంగ అధికార పరిధిని మించిపోయాయని కోర్టు ఈ సందర్భంగా వ్యాఖ్యానించింది. ఇమ్మిగ్రేషన్ లిమిట్ ను నిర్ణయించే అధికారం అధ్యక్షుడికి లేదని కోర్టు స్పష్టం చేసింది. ఈ క్రమంలో ట్రంప్ జారీ చేసిన ఉత్తర్వులను కోర్టు కొట్టివేసింది.
ఈ ఏడాది జూన్ లో H1 B వీసాలపై డిసెంబరు వరకు నిషేధం విధిస్తూ ట్రంప్ తీసుకున్న నిర్ణయం లక్షల సంఖ్యలో విదేశీ ఐటీ నిపుణులకు ఇబ్బందిగా మారింది. ముఖ్యంగా భారత ఐటీ నిపుణులకు ఈ నిర్ణయం తీవ్ర అసంతృప్తి కలిగించింది.
అయితే వీసాలపై ట్రంప్ ఉత్తర్వులను సవాల్ చేస్తూ అమెరికా ఉత్పత్తిదారుల జాతీయ సమాఖ్య, యూఎస్ చాంబర్ ఆఫ్ కామర్స్, నేషనల్ రీటెయిల్ ఫెడరేషన్ కాలిఫోర్నియా కోర్టును ఆశ్రయించాయి. తమ కంపెనీలకు ప్రతిభావంతులైన నిపుణులు రాకుండా ఈ నిబంధనలు అడ్డుకుంటున్నాయని ఆయా సంస్థలు తమ పిటిషన్లలో తెలిపాయి. ఈ పిటిషన్లపై విచారణ జరిపిన న్యాయస్థానం ఈ నిర్ణయం వెలువరించింది.
