- తెల్లారి వచ్చిన ప్యాసింజర్లకు షాక్
- కొద్దిదూరంలో ప్రత్యక్ష్యం
- షాపులకు అడ్డుగా ఉన్నాయనే ఫిర్యాదు చేశాం : ఎంఎంసీ
- కంప్లయింట్ రాలేదు: పోలీసులు
హైదరాబాద్ సిటీ, వెలుగు: చైతన్యపురిలో వారం రోజుల కింద రాత్రికి రాత్రే నాలుగు బస్ షెల్టర్లు మాయమయ్యాయి. మరుసటి రోజు బస్ స్టాప్ కి వచ్చిన ప్రయాణికులకు షెల్టర్లు కనిపించకపోవడంతో పరేషాన్ అయ్యారు. కొద్దిసేపయ్యాక సుమారు వంద మీటర్ల దూరంలో ఏర్పాటు చేసినట్టు తెలుసుకుని అవాక్కయ్యారు.
ఆ బస్షెల్టర్లు కొన్ని దుకాణాలకు అడ్డొస్తున్నందునే రాత్రికి రాత్రే ఆఘమేఘాల మీద మరో చోటికి షిఫ్ట్ చేశారన్న ఆరోపణలు వినిపిస్తున్నాయి. బస్ షెల్టర్లను ఎవరు మార్చారో తమకు తెలియదని యాడ్ ఏజెన్సీ ప్రతినిధులు, ఎంఎంసీ అధికారులు చెప్తున్నారు.
యాడ్ ఏజెన్సీ.. చైతన్యపురి పోలీసులకు ఫిర్యాదు చేసేందుకు వెళ్లగా, పబ్లిక్ ప్రాపర్టీ కావడంతో ఎంఎంసీ లేదా ఆర్టీసీ ఆఫీసర్లు ఫిర్యాదు చేస్తేనే స్వీకరిస్తామని సీఐ చెప్పినట్టు తెలిసింది. మరోవైపు ఎంఎంసీ ఆఫీసర్ పోలీసులకు ఫిర్యాదు చేశామని చెప్తుండగా, ఎలాంటి ఫిర్యాదు రాలేదని పోలీసులంటున్నారు. ఆర్టీసీ అధికారులేమో తాము షిఫ్టింగ్కు అనుమతి ఇవ్వలేదని స్పష్టం చేశారు. ఫైనల్గా ఇందులో ఎంఎంసీ సిబ్బందితో పాటు అధికారుల హస్తం ఉందన్న ఆరోపణలు వినిపిస్తున్నాయి.
దుకాణాలకు అడ్డుగా ఉన్నాయనేనా ?
బస్ షెల్టర్ షిఫ్ట్ చేయాలంటే ఆర్టీసీ, ఎంఎంసీ అధికారులతో పాటు పోలీసులు సంయుక్తంగా ఆమోదం తెలపాల్సి ఉంటుంది. కానీ, చైతన్యపురిలో ఆ రూల్స్ ఏమీ పాటించినట్టు కనిపించడం లేదు. పైగా, బస్షెల్టర్లను ఒకచోటు నుంచి మరో చోటికి తరలిస్తే వాటి మార్పునకు సంబంధించిన కారణాలు, అనుమతులపై స్పష్టత ఇవ్వాల్సి ఉంటుంది. ముందే పేపర్ ప్రకటన ఇవ్వడమో..లేక బస్టాప్ వద్ద బోర్డు లాంటిది ఏర్పాటు చేయాలి. కానీ, ఇక్కడ అవేవీ పాటించలేదు.
