ఆంధ్రప్రదేశ్: రాష్ట్రంలోని కీలక నగరపాలక సంస్థల ఎన్నికల ఫలితాల్లో కూటమి పార్టీలు సత్తా చాటాయి. ఏపీలోనే అతిపెద్ద మున్సిపల్ కార్పొరేషన్ అయిన విశాఖపట్నంలో టీడీపీ విజయభేరి మోగించింది. టీడీపీ మేయర్ అభ్యర్థి ముక్కా శ్రావణి తన సమీప ప్రత్యర్థి వైసీపీ అభ్యర్థి వరుదు కల్యాణిపై ఘన విజయం సాధించారు.
విశాఖపట్నం కార్పొరేషన్ పరిధిలోని మొత్తం 120 డివిజన్లలో అత్యధిక స్థానాలను కూటమి అభ్యర్థులు కైవసం చేసుకున్నారు. దీంతో విశాఖలో టీడీపీ శ్రేణుల్లో ఉత్సాహం నెలకొంది.
విజయం అనంతరం ముక్కా శ్రావణి మాట్లాడుతూ.. విశాఖపట్నం ఎప్పుడూ టీడీపీకి కంచుకోట అని అన్నారు. నగర ప్రజలు తమపై ఉంచిన నమ్మకాన్ని వమ్ము చేయబోమని స్పష్టం చేశారు. సుమారు రెండున్నర లక్షల ఓట్ల మెజార్టీ రావడం సంతోషంగా ఉందని, అయితే ఈ విజయంతో ఆనందం కంటే బాధ్యత మరింత పెరిగిందన్నారు.
ప్రజలు తమపై పెట్టుకున్న నమ్మకాన్ని నిలబెట్టుకుంటూ విశాఖపట్నాన్ని దేశంలోనే నంబర్ వన్ నగరంగా తీర్చిదిద్దేందుకు కృషి చేస్తామని ముక్కా శ్రావణి హామీ ఇచ్చారు.
ఏలూరులో జనసేన
మరోవైపు పశ్చిమగోదావరి జిల్లా ఏలూరు మున్సిపల్ కార్పొరేషన్‌లో జనసేన పార్టీ విజయకేతనం ఎగురవేసింది. ఆ పార్టీ అభ్యర్థి రెడ్డి అప్పలనాయుడు తన సమీప వైకాపా ప్రత్యర్థిపై 44,665 ఓట్ల భారీ మెజార్టీతో విజయం సాధించారు.విశాఖపట్నంలో టీడీపీ, ఏలూరులో జనసేన అభ్యర్థులు సాధించిన విజయాలతో రాష్ట్రంలో కూటమి శ్రేణుల్లో సంబరాలు నెలకొన్నాయి.
