ఐపీఎల్ మినీ ఆక్షన్ లో ఆస్ట్రేలియా ఆల్ రౌండర్ కామెరాన్ గ్రీన్ కు ఊహించినట్టుగానే రికార్డ్ ధర పలికింది. ఈ ఆసీస్ ఆల్ రౌండర్ ను రూ. 25.20 కోట్లతో కోల్కతా నైట్ రైడర్స్ దక్కించుకుంది. గ్రీన్ కోసం చెన్నై సూపర్ కింగ్స్, కేకేఆర్ జట్లు తీవ్రంగా పోటీపడ్డాయి. చివరికి కేకేఆర్ ఈ ఆసీస్ పవర్ హిట్టర్ ను దక్కించుకుంది. ఈ మినీ ఆక్షన్ లో కోల్కతా నైట్ రైడర్స్ రూ. 64.3 కోట్లతో వేలంలోకి అడుగుపెడుతుంది. మరోవైపు చెన్నై రూ.43.4 కోట్లతో బరిలోకి దిగింది. చెన్నై చివరి వరకు పోరాడినా కేకేఆర్ ఈ ఆసీస్ ఆల్ రౌండర్ ను దక్కించుకుంది.
ఆక్షన్ ముందు జడేజా సూపర్ కింగ్స్ జట్టు నుంచి రాజస్థాన్ కు వెళ్లిపోవడంతో గ్రీన్ పై చెన్నై కన్నేసింది. మరోవైపు కేకేఆర్ జట్టులో రస్సెల్ లేకపోవడంతో ఆ జట్టు ఫ్రాంచైజీ ఎలాగైనా గ్రీన్ ను దక్కించుకోవాలని చూసింది. అనుకున్నట్టుగానే ఈ రెండు జట్లు గ్రీన్ కోసం ఎంతకైనా ఖర్చు పెట్టేందుకు వెనకాడలేదు. ఐపీఎల్ మినీ వేలంలో ఇదే రికార్డ్ధర కావడం విశేషం. అంతకముందు ఆసీస్ ఫాస్ట్ బౌలర్ మిచెల్ స్టార్క్ పేరిట ఈ రికార్డ్ ఉంది. 2024 ఐపీఎల్ మినీ వేలంలో స్టార్క్ ను కేకేఆర్ రూ. 24.75 కోట్లకు దక్కించుకుంది.
కామెరాన్ గ్రీన్ ఐపీఎల్ హిస్టరీ:
ఆస్ట్రేలియన్ స్టార్ ఆల్ రౌండర్ కామెరాన్ గ్రీన్ ఐపీఎల్లో ఆర్సీబీ, ముంబై ఫ్రాంచైజీలు తరుఫున ప్రాతినిథ్యం వహించాడు. క్యాచ్ రిచ్ లీగులో ఇప్పటి వరకు 29 మ్యాచులు ఆడిన గ్రీన్ ఒక సెంచరీ, రెండు హాఫ్ సెంచరీలతో సహా 41.5 సగటుతో 707 పరుగులు చేశాడు. ఫాస్ట్ బౌలింగ్తో పాటు టాప్ ఆర్డర్ నుంచి మిడిల్ ఆర్డర్ వరకు ఎక్కడైనా బ్యాటింగ్ చేయగల సామర్థ్యం ఉన్న గ్రీన్ వెన్నుముక గాయం కారణంగా 2025 ఐపీఎల్ సీజన్కు దూరమయ్యాడు.
గాయం కారణంగా టోర్నీకి అందుబాటులో ఉండకపోవడంతో ఆర్సీబీ అతడిని రిటైన్ చేసుకోలేదు. గాయం నుంచి కోలుకుని తిరిగొచ్చిన ఈ ఆల్ రౌండర్ ఈ ఏడాది ఆసీస్ తరుఫున దుమ్మురేపుతున్నాడు. ఈ సంవత్సరం ఆడిన ఎనిమిది T20I లలో 169 స్ట్రైక్ రేట్తో సగటున 43 పరుగులు సాధించాడు. ఈ క్రమంలోనే ఐపీఎల్ వేలానికి కూడా తన పేరును రిజిస్టర్ చేసుకున్నాడు.
The most expensive overseas player bought at an #IPLAuction: Cameron Green 🙌 pic.twitter.com/gubEh0co0H
— ESPNcricinfo (@ESPNcricinfo) December 16, 2025
