ఐపీఎల్ (ఇండియన్ ప్రీమియర్ లీగ్) 2026 సీజన్ కోసం జరగనున్న వేలం ఆసక్తికరంగా మారనుంది. మంగళవారం (డిసెంబర్ 16) అబుదాబిలోని ఎతిహాద్ అరీనాలో మెగా ఆక్షన్ ను నిర్వహించనున్నారు. 350 మంది ఆటగాళ్ల జాబితాను మంగళవారం (డిసెంబర్ 9) బీసీసీఐ ప్రకటించింది. కొంతమంది స్టార్ ఆటగాళ్లు ఈ మినీ వేలంలో ప్రధాన ఆకర్షణగా నిలవనున్నారు. కామెరాన్ గ్రీన్, వెంకటేష్ అయ్యర్, రవి బిష్ణోయ్, డేవిడ్ మిల్లర్, మహేష్ తీక్షణ వంటి స్టార్ ఆటగాళ్లు భారీ ధర పలకడం ఖాయంగా మారింది. స్టీవ్ స్మిత్, డికాక్ లాంటి వెటరన్ ప్లేయర్స్ పై ఆసక్తి నెలకొంది. వీరిలో ఆస్ట్రేలియా స్టార్ ఆల్ రౌండర్ కామోరూన్ గ్రీన్ కు జాక్ పాట్ ఖాయంగా కనిపిస్తోంది.
గ్రీన్ కు మినీ వేలంలో 10 నుంచి 15 కోట్ల ధర పలకడం ఖాయంగా కనిపిస్తుంది. చెన్నై సూపర్ కింగ్స్, కోల్కతా నైట్ రైడర్స్ దగ్గర ఎక్కువ పర్స్ ఉండడంతో ఈ రెండు జట్లు ఈ ఆసీస్ స్టార్ కోసం పోటీ పడే అవకాశాలు కనిపిస్తున్నాయి. కోల్కతా నైట్ రైడర్స్ రూ. 64.3 కోట్లతో .. చెన్నై సూపర్ కింగ్స్ రూ. 43.4 కోట్లతో మినీ ఆక్షన్ లో బరిలోకి దిగుతున్నాయి. మిగిలిన 8 జట్లు దగ్గర రూ.30 కోట్ల లోపే ఉన్నాయి. దీంతో గ్రీన్ ను దక్కించుకునే అవకాశం ఎవరికీ దక్కుతుందో ఆసక్తికరంగా మారింది. జడేజా సూపర్ కింగ్స్ జట్టు నుంచి రాజస్థాన్ కు వెళ్లిపోవడంతో గ్రీన్ పై చెన్నై కన్నేసింది. మరోవైపు కేకేఆర్ జట్టులో రస్సెల్ లేకపోవడంతో ఆ జట్టు ఫ్రాంచైజీ ఎలాగైనా గ్రీన్ ను దక్కించుకోవాలని చూస్తోంది.
కామెరాన్ గ్రీన్ ఐపీఎల్ హిస్టరీ:
ఆస్ట్రేలియన్ స్టార్ ఆల్ రౌండర్ కామెరాన్ గ్రీన్ ఐపీఎల్లో ఆర్సీబీ, ముంబై ఫ్రాంచైజీలు తరుఫున ప్రాతినిథ్యం వహించాడు. క్యాచ్ రిచ్ లీగులో ఇప్పటి వరకు 29 మ్యాచులు ఆడిన గ్రీన్ ఒక సెంచరీ, రెండు హాఫ్ సెంచరీలతో సహా 41.5 సగటుతో 707 పరుగులు చేశాడు. ఫాస్ట్ బౌలింగ్తో పాటు టాప్ ఆర్డర్ నుంచి మిడిల్ ఆర్డర్ వరకు ఎక్కడైనా బ్యాటింగ్ చేయగల సామర్థ్యం ఉన్న గ్రీన్ వెన్నుముక గాయం కారణంగా 2025 ఐపీఎల్ సీజన్కు దూరమయ్యాడు.
గాయం కారణంగా టోర్నీకి అందుబాటులో ఉండకపోవడంతో ఆర్సీబీ అతడిని రిటైన్ చేసుకోలేదు. గాయం నుంచి కోలుకుని తిరిగొచ్చిన ఈ ఆల్ రౌండర్ ఈ ఏడాది ఆసీస్ తరుఫున దుమ్మురేపుతున్నాడు. ఈ సంవత్సరం ఆడిన ఎనిమిది T20I లలో 169 స్ట్రైక్ రేట్తో సగటున 43 పరుగులు సాధించాడు. ఈ క్రమంలోనే ఐపీఎల్ వేలానికి కూడా తన పేరును రిజిస్టర్ చేసుకున్నాడు.
