- భారీ మెజార్టీతో బిల్లును పాస్ చేసిన సెనేట్
- 100% టారిఫ్లు విధించేలా ట్రంప్కు అధికారం!
వాషింగ్టన్: రష్యా ఆర్థిక మూలాలను దెబ్బతీసేందుకు తీసుకొచ్చిన ఆంక్షల బిల్లుపై అమెరికా సెనేటర్ సంచలన వ్యాఖ్యలు చేశారు. రష్యా నుంచి పెద్ద మొత్తంలో చమురు కొనుగోలు చేస్తున్న దేశాలను.. ముఖ్యంగా భారత్, చైనాలను టార్గెట్ చేసి ఈ బిల్లును రూపొందించినట్లు సీనియర్ రిపబ్లికన్ సెనేటర్ రోజర్ విక్కర్ తెలిపారు. తమ మిత్ర దేశాలకు ఎలాంటి హాని కలగకుండా జాగ్రత్త పడ్డామని వివరించారు. ఈమేరకు ఆయన విలేకరుల సమావేశంలో ఈ వివరాలు వెల్లడించారు.
‘‘భారత్, చైనాలను మాత్రమే లక్ష్యంగా చేసుకొని ఈ బిల్లును చాలా జాగ్రత్తగా రూపొందించాం. రష్యా ఇంధనాన్ని విచ్చలవిడిగా కొంటూ పుతిన్ యుద్ధ యంత్రాంగానికి వారే నిధులు సమకూరుస్తున్నారు. ప్రపంచంలో ఎక్కడా వారు మనకు అనుకూలంగా వ్యూహాత్మక లబ్ధి చేకూర్చడం లేదు” అని విక్కర్ పేర్కొన్నారు.
సెనేట్ లో బిల్లుకు ఆమోదం
రష్యా ఇంధన ఆదాయాన్ని కట్టడి చేయడమే లక్ష్యంగా తెచ్చిన ‘లిండ్సే ఓ. గ్రాహం శాంక్షనింగ్ రష్యా అండ్ ఇరాన్ యాక్ట్ 2026’’ బిల్లు అమెరికా సెనేట్లో తొలి అడ్డంకిని దాటింది. సెనేట్లో జరిగిన ఓటింగ్లో ఈ బిల్లుకు అనుకూలంగా 86 ఓట్లు పడగా, వ్యతిరేకంగా 12 ఓట్లు వచ్చాయి. సెనేట్లో ప్రాథమిక ఆమోదం లభించినప్పటికీ, ఈ బిల్లు వెంటనే చట్టంగా మారిపోదు. మరోసారి తుది ఓటింగ్ నిర్వహిస్తారు.
ఆ తర్వాత హౌస్ ఆఫ్ రిప్రజెంటేటివ్స్ కూడా దీనికి ఆమోదముద్ర వేయాలి. చివరిగా అధ్యక్షుడు సంతకం చేసిన తర్వాతే ఇది అమల్లోకి వస్తుంది. బిల్లు ఆమోదం పొందినా భారత్, చైనాలపై 100 శాతం సుంకాలు ఆటోమేటిక్గా పడవు. దేశాల వైఖరిని బట్టి
ఆ సుంకాలు విధించాలా? వద్దా? అనేది అధ్యక్షుడి విచక్షణపైనే ఆధారపడి ఉంటుంది.
బిల్లులోని ప్రధానాంశాలివే..
- రష్యా నుంచి చమురు, గ్యాస్ కొనుగోలు చేయడం కొనసాగించే దేశాల ఉత్పత్తులపై ఏకంగా 100 శాతం వరకు టారిఫ్లు విధించే సర్వాధికారాలు అమెరికా అధ్యక్షుడు డొనాల్డ్ ట్రంప్కు లభిస్తాయి.
- అంతర్జాతీయ ఆంక్షలను పక్కకుపెట్టి రష్యా చమురును గుట్టుచప్పుడు కాకుండా రవాణా చేస్తున్న ‘షాడో ఫ్లీట్’ నౌకలపై కఠిన ఆంక్షలు అమలు చేస్తారు.
- రష్యాకు చెందిన ఉన్నతాధికారులు, దౌత్యవేత్తలతోపాటు ఆ దేశపు ఆస్తిపరులైన ‘ఒలిగార్క్’లపై ఆంక్షలను కఠినతరం చేస్తారు. రష్యా యుద్ధ నిధులను
- కట్టడి చేసే క్రమంలో అక్కడి ప్రధాన బ్యాంకింగ్, ఆర్థిక వ్యవస్థల లావాదేవీలపై కఠిన నిబంధనలు విధించనున్నారు.
