నవాబుపేట, వెలుగు: ఉదండాపూర్ రిజర్వాయర్లో భూములు కోల్పోయిన నిర్వాసితులకు కాంగ్రెస్ ప్రభుత్వం న్యాయం చేస్తుందని సీడబ్ల్యూసీ ప్రత్యేక ఆహ్వానితుడు చల్లా వంశీచంద్రెడ్డి తెలిపారు. శుక్రవారం మండలంలోని పర్వాతాపూర్ మైసమ్మ ఆలయంలో పూజలు నిర్వహించి పాలమూరు న్యాయయాత్రను ప్రారంభించారు. కాకర్లపహాడ్, రుద్రారం, నవాబుపేట గ్రామాల్లో స్థానికులు స్వాగతం పలికారు.
ఈ సందర్భంగా ఏర్పాటు చేసిన కార్నర్ మీటింగ్లో ఆయన మాట్లాడుతూ ఉదండాపూర్ రిజర్వాయర్ పనులను పూర్తి చేసి రైతులకు సాగునీరందిస్తామన్నారు. ఎన్నికల్లో కాంగ్రెస్ పార్టీ ఇచ్చిన ఆరు గ్యారంటీలను త్వరలోనే అమలు చేస్తామని తెలిపారు. ఎమ్మెల్యే అనిరుధ్రెడ్డి ఆధ్వర్యంలో గ్రామాల డెవలప్మెంట్ వేగవంతం చేస్తామన్నారు. రాష్ట్రంలో బీఆర్ఎస్ సర్కారును తరిమికొట్టినట్లుగానే, కేంద్రంలో బీజేపీని సాగనంపి రాహుల్గాంధీని ప్రధానిగా చేయాలని కోరారు.
నిరుపేద జనాల కోసం పనిచేసే కాంగ్రెస్ పార్టీకి జనాలు మద్దతుగా నిలవాలని కోరారు. జనంపల్లి దుశ్యంత్రెడ్డి, ఖాజామహేక్, పీసీసీ స్పోక్స్పర్సన్ జహీర్అఖ్తర్, నీరటి రాంచంద్రయ్య, బంగ్లరవి, హమీద్మహేక్, తుల్సీరాం నాయక్, జలాలోద్దీన్ బాబర్, నర్సింహాచారి, కొల్లూరు ఖాజా, మల్లేశ్యాదవ్, జగన్మోహన్రెడ్డి, రాజు, కొల్లి నర్పింహా, చిర్ప సత్యం పాల్గొన్నారు.
