- తెలుగు రాష్ట్రాలూ 1, 2 స్థానాల్లో ఉండాలి: చంద్రబాబు
చేవెళ్ల/హైదరాబాద్, వెలుగు: భారత్ ప్రస్తుతం ప్రపంచంలో నాలుగో పెద్ద ఆర్థిక వ్యవస్థగా ఉందని, రెండేండ్లలో మూడో స్థానానికి, 2038లో రెండో స్థానానికి, 2047 నాటికి నెంబర్ వన్ ఎకానమీగా మారుతుందని ఏపీ సీఎం చంద్రబాబు అన్నారు. తాను 2000లో విజన్2020ని రిలీజ్ చేస్తే అందరూ నవ్వారని, కానీ ఈ రోజు అంతకంటే బెటర్గా హైదరాబాద్ తయారైందన్నారు. ప్రస్తుతం ఆంధ్రాలో స్వర్ణాంధ్ర ప్రదేశ్ విజన్-2047ను రెడీ చేశామని, తెలంగాణలోనూ తయారు చేస్తున్నారని.. రెండు రాష్ట్రాలు దేశంలో నెంబర్1, 2 గా ఉండాలని ఆకాంక్షించారు.
శనివారం రంగారెడ్డి జిల్లా మొయినాబాద్ సమీపంలోని గండిపేట వద్ద ఎన్టీఆర్ ఎడ్యుకేషనల్ఇన్స్టిట్యూషన్స్ వార్షిక వేడుకల్లో ఎన్టీఆర్ ట్రస్ట్ మేనేజింగ్ ట్రస్టీ నారా భువనేశ్వరితో కలిసి చంద్రబాబు పాల్గొన్నారు. ఈ సందర్భంగా ఆయన మాట్లాడుతూ.. ఈ ప్రాంతం (గండిపేట) ఒకప్పుడు పార్టీ హెడ్ క్వార్టర్ అని.. ఎన్టీఆర్, తాను ఇక్కడే పని చేశామని చెప్పారు. 25 ఏళ్లలో దేశంలో అత్యధిక తలసరి ఆదాయానికి తెలంగాణ చిరునామాగా మారిందంటే అప్పటి తన నిర్ణయమే కారణమని చంద్రబాబు పేర్కొన్నారు.
