బషీర్బాగ్, వెలుగు: తమ వద్ద పెట్టుబడి పెడితే వచ్చే లాభాల్లో వాటా ఉంటుందని నమ్మించి ఓ వ్యక్తి వద్ద ఆన్లైన్ స్కామర్లు రూ.35 లక్షలు కొట్టేశారు. హైదరాబాద్ సైబర్ క్రైం ఏసీపీ శివమారుతి తెలిపిన మేరకు.. ముషీరాబాద్ కు చెందిన 42 ఏళ్ల వ్యక్తి వాట్సాప్ కు జులై 21న రెంట్/స్టెడీ లీజ్ ప్రతినిధుల పేరుతో మెసేజ్ వచ్చింది.
తమ రెంటల్ ప్రాపర్టీస్ వివరాలను పోస్ట్ చేస్తే కమీషన్, ఇన్వెస్ట్మెంట్ చేస్తే షేర్ ఇస్తామని నమ్మించారు. రూ.10 వేలు డిపాజిట్ చేస్తే రూ.10,748 రిటర్న్ చేశారు. రూ.31,259 డిపాజిట్ చేస్తే మరింత లాభం ఇచ్చారు. దీంతో వారిని నమ్మిన బాధితుడు పలు దఫాలుగా రూ.35,26,677 ఇన్వెస్ట్ చేశాడు. ఆ తరువాత స్పందించలేదు. మోసపోయానని గ్రహించిన బాధితుడు సైబర్ క్రైం పోలీసులకు ఫిర్యాదు చేశాడు.
