- ప్రవల్లిక సూసైడ్ కేసులో చిక్కడపల్లి సీఐ సస్పెన్షన్
ముషీరాబాద్, వెలుగు : వరంగల్ కు చెందిన విద్యార్థి మర్రి ప్రవల్లిక ఆత్మహత్య కేసులో నిర్లక్ష్యంగా వ్యవహరించారన్న కారణంతో చిక్కడపల్లి సీఐ పిడమర్తి నరేశ్ను సస్పెండ్ చేశారు. పోటీ పరీక్షలకు ప్రిపేర్ అవుతున్న ప్రవల్లిక .. హైదరాబాద్ లోని అశోక్ నగర్ లో తాను అంటున్న గర్ల్స్ హాస్టల్ లో ఆత్మహత్య చేసుకున్న విషయం తెలిసిందే. దీంతో విద్యార్థులు, నిరుద్యోగులు పెద్ద ఎత్తున ఆ హాస్టల్ కు చేరుకుని ఆందోళన చేశారు.
పరీక్షలను ప్రభుత్వం వాయిదా వేయడంతోనే ప్రవల్లిక ఆత్మహత్య చేసుకుందని వారు ఆరోపించారు. ఈ ఘటనలో శాంతిభద్రతలను కాపాడడంలో చిక్కడపల్లి సీఐ నరేశ్ నిర్లక్ష్యంగా వ్యవహరించారని హైదరాబాద్ పోలీస్ కమిషనర్ సందీప్ శాండిల్య ఆదివారం ఆయనకు ఉత్తర్వులు జారీ చేశారు.