ఫ్లయింగ్ సాసర్ భూమ్మీద దిగిందేంది? కొంపదీసి వేరే గ్రహపోళ్లు వచ్చిండ్రా ఏంది? అనుకుంటున్నరా! కానే కాదు.. ఇది ఫ్లయింగ్ సాసరూ కాదు.. వేరే గ్రహపోళ్లు రానే లేదు. ఇది హెలికాప్టర్. అత్యంత ఆధునిక ఆయుధాలను తయారు చేస్తున్న చైనా, అందులో భాగంగానే ఈ యూఎఫ్వో హెలికాప్టర్ను తయారు చేసింది. ఈ మధ్య టియాంజిన్లో జరిగిన చైనా హెలికాప్టర్ ఎగ్జిబిషన్లో దాని ప్రొటోటైప్ను చైనా విడుదల చేసింది. ‘సూపర్ గ్రేట్ వైట్ షార్క్’ అని చైనా మీడియా పిలుస్తోంది. అమెరికన్ ఏహెచ్64 అపాచీ, సీహెచ్53 సీ స్టాలియన్, రష్యా కేఏ 52, ఎంఐ 26 హెలికాప్టర్ల కన్నా అత్యంత శక్తిమంతమైందట ఈ యూఎఫ్వో హెలికాప్టర్.
25 అడుగుల పొడవు, 10 అడుగుల వెడల్పున్న ఈ హెలికాప్టర్లో ఇద్దరు మాత్రమే ప్రయాణించడానికి వీలుందట. రాడార్ల కంటికి చిక్కకుండా ఉండేందుకే ఈ సరికొత్త డిజైన్ను చైనా తయారు చేసిందట. ఇంజన్లు, రోటార్లు అన్నీ బయటి చిప్పలోనే ఉంటాయట. అయితే, ఫ్లయింగ్ సాసర్ స్ఫూర్తిగా తయారు చేసిన తొలి హెలికాప్టర్ మాత్రం ఇది కాదండోయ్. ఎందుకంటే 1950లోనే కెనడా అలాంటి ఒక హెలికాప్టర్ను తయారు చేసింది. దాని పేరు వీజెడ్ 9 అవ్రోకార్. ఏవీ రో అనే కంపెనీ తయారు చేసింది. అమెరికా టెస్ట్ చేసింది. అయితే, మూడడుగులకు మించి అది ఎగరలేకపోయింది. గంటకు 56 కిలోమీటర్ల వేగానికి మించి పోలేకపోయింది. 1961 తర్వాత ఆ ప్రాజెక్టును ఆపేశారనుకోండి.
