ప్రపంచంలోనే ప్రముఖ చిప్ తయారీ సంస్థల్లో ఒకటైన ఎన్విడియా ఇప్పుడు కొత్త సీఈఓ కోసం వెతుకుతున్నట్లు వార్తలు వస్తున్నాయి. కంపెనీకి దాదాపు 30 ఏళ్లుగా నాయకత్వం వహించిన జెన్సన్ హువాంగ్ తన పదవికి రాజీనామా చేయడంతో, ఆయన స్థానంలో ఎవరు బాధ్యతలు చేపడతారనే చర్చ మొదలైంది.
ఈ రేసులో భారత సంతతికి చెందిన ముగ్గురు ప్రముఖ టెక్నాలజీ అధినేతల పేర్లు వినిపిస్తున్నాయి. వీరిలో మైక్రాన్ టెక్నాలజీ సీఈఓ సంజయ్ మెహ్రోత్రా, పాలో ఆల్టో నెట్‌వర్క్స్ సీఈఓ నికేష్ అరోరా, గూగుల్ క్లౌడ్ సీఈఓ థామస్ కురియన్ ఉన్నారు.
సమాచారం ప్రకారం, ఎన్విడియా కొత్త సీఈఓ నియామకం కోసం ఒక ప్రత్యేక సంస్థ సాయం తీసుకుంటోంది. కొత్త సీఈఓను ఎంపిక చేసే వరకు కంపెనీ సీఎఫ్‌ఓ కోలెట్ క్రెస్ తాత్కాలిక సీఈఓగా బాధ్యతలు నిర్వహించనున్నారు. అలాగే, కంపెనీ సుదీర్ఘకాలంగా డైరెక్టర్‌గా ఉన్న హార్వే జోన్స్‌ను తొలిసారిగా బోర్డు ఛైర్మన్‌గా నియమించింది.
సీఈఓ రేసులో ఉన్న ముగ్గురు భారతీయులు ఎవరు?
1. సంజయ్ మెహ్రోత్రా – మైక్రాన్ టెక్నాలజీ సీఈఓ
సంజయ్ మెహ్రోత్రాకు సెమీకండక్టర్ రంగంలో ఎన్నో ఏళ్ల అనుభవం ఉంది. ప్రస్తుతం ఆయన మైక్రాన్ టెక్నాలజీకి సీఈఓగా ఉన్నారు. మెమరీ చిప్‌ల తయారీలో ఈ కంపెనీకి మంచి గుర్తింపు ఉంది. సంజయ్ మెహ్రోత్రా నాయకత్వంలో మైక్రాన్ కంపెనీ షేర్ల విలువ భారీగా పెరిగింది. ముఖ్యంగా ఆర్టిఫిషియల్ ఇంటెలిజెన్స్ (AI) రంగం అభివృద్ధి చెందడంతో మెమరీ చిప్‌లకు డిమాండ్ పెరిగింది. అలాగే కంపెనీ ఎదుగుదలకు ఉపయోగపడింది.
2. నికేష్ అరోరా – పాలో ఆల్టో నెట్‌వర్క్స్ సీఈఓ
నికేష్ అరోరా 2018 నుంచి పాలో ఆల్టో నెట్‌వర్క్స్ సంస్థకు సీఈఓగా పనిచేస్తున్నారు. సైబర్ సెక్యూరిటీ రంగంలో ఈ కంపెనీ ప్రముఖ సంస్థగా ఉంది. నికేష్ అరోరా నాయకత్వంలో కంపెనీ AI ఆధారిత సైబర్ సెక్యూరిటీ సేవలను మరింత విస్తరించింది. అంతకుముందు నికేష్ అరోరా సాఫ్ట్‌బ్యాంక్‌లో ప్రెసిడెంట్, చీఫ్ ఆపరేటింగ్ ఆఫీసర్‌గా పనిచేశారు. గూగుల్‌లో కూడా దాదాపు పదేళ్ల పాటు పనిచేసిన అనుభవం ఉంది.
3. థామస్ కురియన్ – గూగుల్ క్లౌడ్ సీఈఓ
థామస్ కురియన్ ప్రస్తుతం గూగుల్ క్లౌడ్‌కు సీఈఓగా ఉన్నారు. క్లౌడ్ కంప్యూటింగ్, AI సేవలు, పెద్ద కంపెనీలకు అవసరమైన టెక్నాలజీ సేవలను థామస్ కురియన్ పర్యవేక్షిస్తున్నారు. భారీ టెక్నాలజీ సంస్థలను నడిపించడంలో, ప్రపంచవ్యాప్తంగా ఉన్న పెద్ద కంపెనీలతో కలిసి పనిచేయడంలో థామస్ కురియన్ కి మంచి అనుభవం ఉంది.
ఈ రేసులో ఉన్న ఇతర ప్రముఖులు
భారతీయులైన ఈ ముగ్గురితో పాటు ఎన్విడియాలో పనిచేస్తున్న మరికొందరి పేర్లు కూడా వినిపిస్తున్నాయి.
కోలెట్ క్రెస్: ఇతను ఎన్విడియా సీఎఫ్‌ఓగా ఉన్నారు. ప్రస్తుతం తాత్కాలిక సీఈఓ బాధ్యతలు చూస్తున్నారు.
ఇయాన్ బక్: ఇతను ఎన్విడియా వైస్ ప్రెసిడెంట్‌గా ఉన్నారు. AI కంప్యూటింగ్‌లో కీలకమైన CUDA సాఫ్ట్‌వేర్ అభివృద్ధిలో ఆయన ముఖ్య పాత్ర పోషించారు.
బయటి సంస్థల నుంచి చూస్తే... ప్రముఖ చిప్ డిజైన్ సంస్థ ఆర్మ్ సీఈఓ రెనే హాస్.. ఆపిల్ సంస్థలో చీఫ్ హార్డ్‌వేర్ ఆఫీసర్‌గా పనిచేస్తున్న జానీ స్రౌజీ పేర్లు కూడా ఈ రేసులో ఉన్నట్లు వినిపిస్తున్నాయి. అయితే, వీరంతా ప్రస్తుతం వినిపిస్తున్న పేర్లు మాత్రమే. ఎన్విడియా ఇంకా తుది నిర్ణయం తీసుకోలేదు.
ALSO READ : ఓపెన్ AIతో సహా మైక్రోసాఫ్ట్ 365 సర్వీసులు డౌన్
అసలు జెన్సన్ హువాంగ్ ఎందుకు రాజీనామా చేశారు?
ఎన్విడియా సహ వ్యవస్థాపకుడు, సీఈఓ జెన్సన్ హువాంగ్ రాజీనామా వార్త టెక్నాలజీ ప్రపంచంలో చర్చనీయాంశంగా మారింది. కొందరు మహిళలతో ఆయనకు వివాహేతర సంబంధాలు ఉన్నాయంటూ కొన్ని వార్తలు రావడం ఈ వివాదానికి కారణమైంది. అంతేకాకుండా, అమెరికా నిఘా సంస్థలు చైనా గూఢచారిగా అనుమానిస్తున్న ఒక వ్యాపారవేత్తతో ఆయనకు సంబంధాలు ఉన్నాయనే ఆరోపణలు కూడా తెరపైకి వచ్చాయి.
ఈ విషయాలపై అమెరికాలో జాతీయ భద్రతకు సంబంధించిన ఆందోళనలు వ్యక్తమయ్యాయి. దీనిపై విచారణ జరపాలనే డిమాండ్లు కూడా వచ్చాయి. ఈ నేపథ్యంలో జెన్సన్ హువాంగ్ తన పదవికి రాజీనామా చేసినట్లు వార్తలు వచ్చాయి. తన భార్యకు నమ్మకద్రోహం చేశానని అంగీకరిస్తూ, భార్య, పిల్లలు, కంపెనీ ఉద్యోగులకు క్షమాపణలు చెప్పినట్లు నివేదికలు పేర్కొన్నాయి.
అయితే, కంపెనీ రహస్యాలు బయటకు వెళ్లాయని లేదా దేశ భద్రతకు ముప్పు ఏర్పడిందని భావించడానికి ఎలాంటి కారణం లేదని ఎన్విడియా స్పష్టం చేసినట్లు సమాచారం.
చివరిగా.. దాదాపు 30 ఏళ్ల పాటు ఎన్విడియాను నడిపించిన జెన్సన్ హువాంగ్ స్థానంలోకి కొత్త వ్యక్తిని ఎంపిక చేయడం కంపెనీకి పెద్ద సవాలుగా మారింది. AI రంగంలో ఎన్విడియా ప్రపంచవ్యాప్తంగా కీలక స్థానంలో ఉండటంతో, కొత్త సీఈఓ ఎంపికపై అందరి దృష్టి నెలకొంది.
ముఖ్యంగా ఈ రేసులో ముగ్గురు భారత సంతతి టెక్నాలజీ దిగ్గజాల పేర్లు వినిపిస్తుండటంతో భారతీయుల్లోనూ ఆసక్తి పెరిగింది. అయితే, ఎన్విడియా నెక్స్ట్ సీఈఓగా ఎవరిని ఎంపిక చేస్తుందనేది అధికారిక ప్రకటన వచ్చే వరకు వేచి చూడాల్సిందే.
