యాదాద్రి, వెలుగు: అంగన్వాడీలను ప్రభుత్వ ఉద్యోగులుగా గుర్తించి, వెంటనే పర్మినెంట్ చేయాలని సీఐటీయూ రాష్ట్ర ప్రధాన కార్యదర్శి పాలడుగు భాస్కర్ డిమాండ్ చేశారు. ఆదివారం భువనగిరిలో జరిగిన అంగన్వాడీ టీచర్స్ అండ్ హెల్పర్స్ యూనియన్ రాష్ట్ర మహాసభల్లో ఆయన పాల్గొని మాట్లాడారు. ఐసీడీఎస్ను పథకంగా కాకుండా ప్రభుత్వ శాఖగా గుర్తించాలన్నారు. ఎక్కువ నిధులు కేటాయించాలని కోరారు.
అంగన్వాడీలకు గ్రాట్యూటీ ఇవ్వాలని సుప్రీంకోర్టు ఇచ్చిన తీర్పును అమలు చేయాలన్నారు. సుప్రీంకోర్టు, కాగ్ నివేదికను కేంద్రం పట్టించుకోకుండా ఐసీడీఎస్ను ఎత్తి వేసేందుకు కుట్ర పన్నుతోందని ఆరోపించారు. అంతకు ముందు అంగన్వాడీ కార్యకర్తలు ర్యాలీ నిర్వహించారు. అంగన్వాడీ టీచర్స్ అండ్ హెల్పర్స్ యూనియన్ రాష్ట్ర అధ్యక్షురాలు పద్మ, ప్రధాన కార్యదర్శి జయలక్ష్మి, చంద్రారెడ్డి తదితరులు పాల్గొన్నారు.
