- ఆయన పనితీరు, అవినీతి, అక్రమాలపై పలు ఆరోపణలు
- ఏడాదిన్నర కిందట సరెండర్చేసిన అప్పటి కలెక్టర్ హోళికేరి
- కొద్ది నెలల్లోనే మెదక్ జిల్లాలోనూ సరెండర్ చేసిన అధికారులు
- ఆపై రెండు జిల్లాలు తిరిగి మళ్లీ పైరవీలతో మంచిర్యాలకే..
మంచిర్యాల, వెలుగు: సివిల్ సప్లయిస్ కార్పొరేషన్ మంచిర్యాల జిల్లా మేనేజర్(డీఎం) గోపాల్ పనితీరుపై విమర్శలు వెల్లువెత్తుతున్నాయి. ఆయన వ్యవహారశైలి కారణంగా ఉన్నతాధికారులకు సైతం ఇబ్బందికరమైన పరిస్థితులు ఎదురవుతున్నాయి. గతంలో ధాన్యం కొనుగోళ్లలో పలు ఆరోపణలపై అప్పటి కలెక్టర్ భారతి హోళికేరి సివిల్సప్లయిస్ డిపార్ట్మెంట్కు సరెండర్ చేశారు. ఆ తర్వాత మెదక్ జిల్లాకు వెళ్లిన కొద్ది రోజులకే అక్కడి ఉన్నతాధికారులు ‘ఈయన మాకొద్దు’ అంటూ సరెండర్ చేశారు. అనంతరం కుమ్రం భీమ్ ఆసిఫాబాద్ జిల్లాలో పోస్టింగ్పొందిన ఆయన ఏడాది కిందట తిరిగి మంచిర్యాలకే వచ్చారు. ప్రస్తుత కలెక్టర్ సంతోష్ కూడా గోపాల్ను ఇక్కడి నుంచి ట్రాన్స్ఫర్ చేయాలని ఇటీవల సివిల్ సప్లయిస్ ఎండీకి లెటర్ రాసినట్టు తెలిసింది. దీంతో ఆయన పనితీరు సర్వత్రా చర్చనీయాంశంగా మారింది.
అవినీతి ఆరోపణలు, విధుల్లో నిర్లక్ష్యం..
గతంలో ఉమ్మడి ఆదిలాబాద్ జిల్లా డీఎంగా పనిచేసిన గోపాల్ మంచిర్యాల జిల్లా ఆవిర్భావంతో 2016 అక్టోబర్లో ఇక్కడ ఇన్చార్జి డీఎంగా బాధ్యతలు చేపట్టి 2017 వరకు కొనసాగారు. 2019 జూన్లో పూర్తిస్థాయి బాధ్యతలు స్వీకరించి 2022 మే వరకు పనిచేశారు. ఈ మధ్యకాలంలో గోపాల్పై పలు అవినీతి ఆరోపణలతో పాటు విధుల్లో నిర్లక్ష్యంగా వ్యవహరిస్తున్నారనే విమర్శలు వచ్చాయి.
ధాన్యం కొనుగోళ్లలో జాప్యం చేయడం, గోనె సంచులు, లారీలు సమకూర్చడంలో, కాంటా వేసిన వడ్లను మిల్లులకు తరలించడంతో నిర్లక్ష్యం, ధాన్యం సేకరణకు సంబంధించి రోజువారీగా రిపోర్టులు ఇవ్వకపోవడం వంటి 9 కారణాలతో అప్పటి కలెక్టర్ భారతి హోళికేరి 2022 మే 28న గోపాల్ను సివిల్సప్లయిస్ డిపార్ట్మెంట్కు సరెండర్ చేశారు. ఆ తర్వాత మెదక్ జిల్లా డీఎంగా పోస్టింగ్ పొందిన ఆయన అక్కడ కూడా సరిగా పనిచేయలేదు.
విధుల్లో నిర్లక్ష్యంతో పాటు పలు ఆరోపణల కారణంగా కొద్ది నెలల్లోనే అక్కడి ఉన్నతాధికారులు గోపాల్ను సరెండర్ చేశారు. అనంతరం 2023 ఆరంభంలో కుమ్రం భీమ్ఆసిఫాబాద్ జిల్లా డీఎంగా పోస్టింగ్ ఇచ్చారు. అప్పటివరకు మంచిర్యాల ఇన్చార్జి డీఎంగా ఉన్న ఆర్డీఓ వేణు ప్రమోషన్పై వెళ్లగానే ఖాళీ అయిన స్థానంలో గోపాల్ను నియమించారు. నిరుడు ఆగస్టు 3న ఇక్కడ డీఎంగా పోస్టింగ్ ఇచ్చారు. ఉన్నతాధికారులు ఆయనపై ఉన్న ఆరోపణలను పట్టించుకోకుండా గతంలో సరెండర్అయిన జిల్లాకే తిరిగి పోస్టింగ్ఇవ్వడం అందరినీ ఆశ్చర్యపర్చింది.
అయినా తీరు మారలే..
రెండుసార్లు సరెండర్ అయి, రెండు జిల్లాలు తిరిగి ఎట్టకేలకు మంచిర్యాల డీఎంగా వచ్చినప్పటికీ గోపాల్ పనితీరు మారలేదన్న గుసగుసలు వినిపిస్తున్నాయి. జిల్లాలో మరికొద్ది రోజుల్లో ధాన్యం కొనుగోళ్లు ప్రారంభం కానున్నాయి. గత అనుభవాల నేపథ్యంలో గోపాల్ను ఇక్కడి నుంచి ట్రాన్స్ఫర్చేయాలని కలెక్టర్ సంతోష్ సివిల్సప్లయిస్ డీఎంకు ఇటీవల లెటర్ రాసినట్టు సమాచారం. ఈ మధ్యకాలంలోనూ గోపాల్పై అనేక ఆరోపణలు వచ్చాయి. గోనె సంచులకు సంబంధించి గోల్మాల్ చేసి ఆ లెక్కలను ఇప్పుడు సరిచేస్తున్నట్టు తెలిసింది. రైస్మిల్లర్ల నుంచి అగ్రిమెంట్స్తీసుకోకుండానే వడ్లు కేటాయించడం, సీఎంఆర్ సేకరణలో నిర్లక్ష్యం, ఎంఎల్ఎస్పాయింట్లు, గోదాముల నుంచి బియ్యం మాయం కావడంతో పాటు పలు అంశాలపై ఉన్నతాధికారులకు ఫిర్యాదులు వెళ్లినట్టు సమాచారం.
అంతా ఆ ఉద్యోగి మహిమలే..!
సివిల్సప్లయిస్ డీఎం ఆఫీస్లో దీర్ఘకాలంగా తిష్టవేసిన ఒక ఉద్యోగి కనుసన్నల్లో డీఎం గోపాల్ నడచుకుంటున్నాడని ఆరోపణలు వస్తున్నాయి. ఉద్యోగులను, సిబ్బందిని కంట్రోల్ చేయడం, మిల్లర్లను మేనేజ్ చేయడం అంతా ఆ ఉద్యోగి ‘మహి’మలేనని తెలుస్తోంది. సరెండర్ అయిన తర్వాత ఇతర జిల్లాలో పనిచేస్తున్న గోపాల్ను మళ్లీ ఇక్కడికి తీసుకురావడంలోనూ ఆయనదే కీరోల్అని సమాచారం. సదరు ఉద్యోగి చాలా ఏండ్లుగా డీఎం ఆఫీస్లో మకాం వేసి మొత్తం సిస్టమ్నే తన కంట్రోల్లోకి తెచ్చుకున్నట్లు ఆరోపణలున్నాయి. ఉన్నతాధికారులు ఆయనపై ఎంక్వైరీ చేసి శాఖాపరమైన చర్యలు తీసుకోవాలని కోరుతున్నారు.
