మహబూబ్ నగర్(నారాయణ పేట), వెలుగు: జిల్లాలో ఆయిల్ పామ్ సాగు కోసం నిర్దేశించిన లక్ష్యాన్ని చేరుకునేందుకు చర్యలు తీసుకోవాలని నారాయణపేట కలెక్టర్ సిక్తా పట్నాయక్ ఆదేశించారు. హార్టికల్చర్, అగ్రికల్చర్ ఆఫీసర్లు సమన్వయంతో పని చేయాలని సూచించారు. శనివారం కలెక్టరేట్ లో ఏర్పాటు చేసిన సమావేశంలో ఆయిల్ పామ్ సాగుపై రివ్యూ చేశారు. ఈ సందర్భంగా కలెక్టర్ మాట్లాడుతూ జిల్లాలో ఈ ఆర్థిక సంవత్సరంలో 3,500 ఎకరాల్లో ఆయిల్ పామ్ చేయాల్సి ఉండగా, ఇప్పటి వరకు 54 ఎకరాల్లో సాగు చేసినట్లు తెలిపారు.
ఆయిల్ పామ్ సాగుకు రాష్ట్ర ప్రభుత్వం ప్రాధాన్యత ఇస్తోందని, రాష్ట్ర స్థాయిలో ఉన్నతాధికారులు ఎప్పటికప్పుడు సమీక్షిస్తున్నారని చెప్పారు. రైతులకు ఆయిల్ పామ్ సాగుతో వచ్చే లాభాల గురించి వివరించాలని సూచించారు. ఒక్కో మండలంలో 50 ఎకరాలకు తగ్గకుండగా సాగు చేయించాలని ఏవోలకు టార్గెట్ పెట్టారు. వారానికి మూడు రోజులు రైతు వేదికల్లో సమావేశాలు ఏర్పాటు చేసి వంద శాతం టార్గెట్ పూర్తి చేయాలని ఆదేశించారు. హార్టికల్చర్ డీడీ రామలక్ష్మి, ఆయిల్ ఫెడ్ రాష్ట్ర ప్రత్యేకాధికారి సత్యనారాయణ, జిల్లా ఉద్యానవన, పట్టు పురుగుల పెంపకం అధికారి సాయిబాబా, డీఏవో జాన్ సుధాకర్, డీడీ రాజారత్నం పాల్గొన్నారు.
