గోపాల్ పేట, వెలుగు: వడ్ల కొనుగోలు కేంద్రాల్లో రైతులకు పూర్తి స్థాయిలో సౌలతులు కల్పించాలని వనపర్తి కలెక్టర్ తేజస్ నందలాల్ పవార్ ఆదేశించారు. బుధవారం మండలంలోని ధనసింగ్ తండాలో ఏర్పాటు చేసిన కొనుగోలు కేంద్రాన్ని అడిషనల్ కలెక్టర్ ఎం.నగేశ్, స్పెషల్ ఆఫీసర్ లక్ష్మీబాయితో కలిసి ప్రారంభించారు. అనంతరం కొనుగోలు కేంద్రం నిర్వాహకులకు పలు సూచనలు చేశారు.
రైతులకు ఇబ్బంది కలగకుండా జాగ్రత్తలు తీసుకోవాలన్నారు. తండాలో తాగునీటి సరఫరాకు తీసుకుంటున్న చర్యలను పంచాయతీ సెక్రటరీని అడిగి తెలుసుకున్నారు. అనంతరం మండల కేంద్రంలోని పీహెచ్సీని కలెక్టర్ సందర్శించి రికార్డులను పరిశీలించారు. రోగులతో మాట్లాడి వైద్యం ఎలా చేస్తున్నారని అడిగి తెలుసుకున్నారు. పీహెచ్సీకి వచ్చే రోగులకు నాణ్యమైన వైద్యం అందించాలని సూచించారు.
అలాగే మిషన్ భగీరథ పంప్ హౌజ్ ను పరిశీలించారు. పంప్ హౌజ్ లో జరుగుతున్న వాటర్ ట్రీట్ మెంట్ పై ఆరా తీశారు. అనంతరం తహసీల్దార్ ఆఫీస్లో తాగునీటి సరఫరాపై రివ్యూ నిర్వహించారు. గ్రామాల్లో నీటి కొరత ఉంటే ప్రత్యామ్నాయ ఏర్పాట్లు చేసుకోవాలని సూచించారు. డీడబ్ల్యూవో లక్ష్మీబాయి, తహసీల్దార్ శ్రీనివాసులు, ఎంపీవో హుస్సేనప్ప, పంచాయతీ కార్యదర్శి బాలరాజు, ఎస్ఈ జగన్మోహన్, ఈఈ మేఘారెడ్డి, డిప్యూటీ డీఎంహెచ్వో శ్రీనివాసులు, వైద్యాధికారులు కృష్ణ కుమారి, మమత ఉన్నారు.
