- పార్లమెంట్ ఎలక్షన్ ముగిసినందున జోరుగా పైరవీలు
- పదవులు పొందే పట్టుదలతో ప్రయత్నాలు
- ఇప్పటికే ఒక విడతలో నలుగురికి దక్కిన స్టేట్ పోస్టులు
- మరో ఫేజ్ పదవులపై సీనియర్లు పోటీ
నిజామాబాద్, వెలుగు: నిజామాబాద్ జిల్లా కాంగ్రెస్ లీడర్లు నామినేటేడ్ పోస్టుల భర్తీపై ఆశలు పెట్టుకున్నారు. పార్లమెంట్ ఎలక్షన్ టైంలో జిల్లాలోని నలుగురు ముఖ్య నేతలకు పదవులు రాగా ఇంకా చాలా మంది రేసులో ఉన్నారు. ఎన్నికలు ముగిసినందున వారు పదవుల కోసం మళ్లీ పైరవీలు షురూ చేశారు. పదేండ్ల తర్వాత కాంగ్రెస్ సర్కారు రావడంతో ప్రయారిటీ పోస్టులు దక్కించుకోవాలని ఆరాటపడుతున్నారు. పార్టీలో తన సీనియారిటీ, ప్రతిపక్షంలో ఎదుర్కొన్న ఇబ్బందులను గుర్తు చేస్తున్నారు. తమకున్న అర్హతలను సర్కారుకు చేరేలా ప్రయత్నాలు చేస్తున్నారు. నామినేటెడ్ పోస్టులతో పాటు మంత్రివర్గంలో ఉమ్మడి జిల్లా నుంచి ఎవరికి చాన్స్ లభిస్తుందనే విషయంపై కూడా జోరు చర్చ నడుస్తోంది.
లిస్టు పెద్దదే
ఇందూరు జిల్లా నుంచి నామినేటెడ్ పోస్టుల కోసం పోటీపడుతున్న లీడర్ల సంఖ్య ఎక్కువే ఉంది. అసెంబ్లీ ఎలక్షన్లో పార్టీ హైకమాండ్ నిర్ణయానికి కట్టుబడి పోటీ చేయలేకపోయిన నేతలకు ఫస్ట్ ఫేజ్లో పోస్టులు ఇచ్చింది. బాల్కొండ సెగ్మెంట్కు చెందిన డీసీసీ ప్రెసిడెంట్ మానాల మోహన్రెడ్డిని స్టేట్ కో -ఆపరేటివ్ లిమిటెడ్ చైర్మన్గా అదే నియోజకవర్గానికి చెందిన బీసీ నేత ఈరవత్రి అనిల్ను మినరల్ డెవలప్మెంట్ కార్పొరేషన్ చైర్మన్గా అర్బన్ సెగ్మెంట్కు చెందిన తాహెర్ను ఉర్దూ అకాడమీ చైర్మన్గా నియమించింది.
ఈ ముగ్గురు నేతలు పార్లమెంట్ ఎన్నికలకు ముందు పదవులు పొందారు. కామారెడ్డిలో సీఎం రేవంత్రెడ్డి కోసం నిజామాబాద్ అర్బన్ నియోజకవర్గం నుంచి కాంగ్రెస్ అభ్యర్థిగా పోటీ చేసి ఓడిపోయినా షబ్బీర్అలీని గవర్నమెంట్ సలహాదారుడిగా క్యాబినేట్ హోదాలో నియమించింది. అయితే మాజీ మంత్రి మండవ వెంకటేశ్వరరావు స్టేట్లో మంచి హోదాలోని నామినేటెడ్ పదవిని ఆశిస్తున్నారు. దీని కోసం తన సమీప బంధువు మంత్రి తుమ్మల నాగేశ్వర్రావును ఆశ్రయించారు. తుమ్మల వల్లే మండవ అసెంబ్లీ ఎన్నికలప్పుడు బీఆర్ఎస్ వీడి కాంగ్రెస్లో చేరారు.
మాజీ ఎమ్మెల్సీలు ఆకుల లలిత, అరికెల నర్సారెడ్డి, డి.రాజేశ్వర్ కూడా పైరవీలు చేస్తున్నారు. వీరిలో ఆకుల లలిత ఢిల్లీ లెవల్లో ప్రయత్నాలు చేస్తుండగా మిగితా ఇద్దరు సీఎం రేవంత్ రెడ్డి ద్వారా ప్రయత్నాలు చేస్తున్నారు. చట్టసభలకు ఎన్నికయ్యే చాన్స్ సమీపంలో లేనందున నామినేటెడ్ పదవులతో సరిపెట్టుకోవాలని అనుకుంటున్నారు. ఆర్మూర్, బాల్కొండ అసెంబ్లీ సెగ్మెంట్ నుంచి ఎమ్మెల్యేగా పోటీ చేసి ఓడిపోయిన వినయ్రెడ్డి, ముత్యాల సునీల్రెడ్డి ఆయా సెగ్మెంట్లకు పార్టీ ఇన్ఛార్జ్లుగా వ్యవహరిస్తున్నారు.
ప్రొటోకాల్ గొడవ రాకుండా ఉండడానికి రాష్ట్ర స్థాయి నామినేటెడ్ బెర్త్లు ఆశిస్తున్నారు. ఎస్సీ సామాజిక వర్గానికి చెందిన గడుగు గంగాధర్ మిగితా నేతలందరికంటే రేస్లో ముందున్నారు. 20 04 నుంచి 2014 దాకా రెండు విడతలు కాంగ్రెస్ పార్టీ రూలింగ్లో ఉన్నప్పుడు గడుగుకు ఛాన్స్ వచ్చినట్లే వచ్చి చేజారింది. టీపీసీసీ జనరల్ సెక్రెటరీగా కొనసాగుతున్న తనను ఈసారైనా గుర్తించాలని ముమ్మర ప్రయత్నం చేస్తున్నారు.
మార్కెట్ కమిటీకి అంతే పోటీ
ప్రతి ఏడాది రూ.2,300 కోట్ల ఉన్న టర్నోవర్తో రూ.23 కోట్ల నెట్ ఆమ్దానీ గల నిజామాబాద్ అగ్చికల్చర్ మార్కెట్ పోస్టుకు ఎనిమిది మంది నేతలు పోటీలో ఉన్నారు. డిప్యూటీ మినిస్టర్ సమాన హోదాగల ఈ పదవిని దక్కించుకోవాలని అంతిరెడ్డి రాజిరెడ్డి, మునిపల్లి సాయిరెడ్డి, నరాల రత్నాకర్, కేశవేణు, శేఖర్గౌడ్తో పాటు ఇంతకు ముందు ఒకసారి ఇదే కమిటీకి చైర్మన్గా పనిచేసిన నగేశ్ రెడ్డి, కంచెట్టి గంగాధర్, గజవాడ జైపాల్ రేస్లో ఉన్నారు.
మంత్రివర్గంలో ఎవరు..?
సీఎం రేవంత్రెడ్డి మొదటి విడత మంత్రివర్గంలో ఉమ్మడి జిల్లా నుంచి ఎవరికీ అవకాశం లభించలేదు. పార్లమెంట్ ఎన్నికలు ముగిసినందున రాష్ట్ర క్యాబినెట్ విస్తరణపై సీఎం ఫోకస్ పెట్టినట్లు సంకేతాలు కనిపిస్తున్నాయి. ఇందులో చాన్స్ ఎవరికి దక్కబోతుందన్నది పాయింట్ పార్టీలో ఉత్కంఠ రేపుతోంది. జిల్లాలో మంత్రి ఉంటే నామినేటెడ్ పదవులు లభించేలా సిఫారసులు చేసుకోవడం ఈజీ అయ్యేదనే అభిప్రాయం చాలా మంది లీడర్లలో ఉంది. మంత్రి వర్గంలో చోటు సంపాదించేందుకు సీనియర్లు, జూనియర్లు అనే తేడా లేకుండా అందరూ తమ ప్రయత్నాల్లో మునిగిపోయారు.
