హసన్ పర్తి, వెలుగు: బీసీ రిజర్వేషన్ల విషయంలో పార్లమెంట్ వేదికగా కేంద్ర ప్రభుత్వంపై కాంగ్రెస్ కొట్లాడాలని రాష్ట్ర బీసీ జేఏసీ వర్కింగ్ చైర్మన్ జాజుల శ్రీనివాస్గౌడ్ కోరారు. తెలంగాణ సీఎం రేవంత్ రెడ్డి అఖిలపక్షాన్ని ఢిల్లీకి వెళ్లి ప్రధానితో భేటీ కావాలని సూచించారు. కాకతీయ యూనివర్సిటీలో బీసీ విద్యార్థి జేఏసీ అధ్యక్షుడు నాగరాజు గౌడ్ ఆధ్వర్యంలో ఆరు రోజులుగా జరుగుతున్న బీసీల ధర్మ పోరాట దీక్ష శనివారం ముగిసింది.
ఈ కార్యక్రమానికి జాజుల హాజరై మాట్లాడారు. పార్లమెంటులో బీసీ బిల్లుపై చర్చించి రాజ్యాంగ సవరణ ద్వారా రిజర్వేషన్లకు ఆమోదం తెలపాలని డిమాండ్ చేశారు. లేదంటే డిసెంబర్ మొదటి వారంలో వేలాది మందితో పార్లమెంటును దిగ్బంధిస్తామని హెచ్చరించారు. బీసీ రిజర్వేషన్లకు చట్టబద్ధత కల్పించకుండా రాష్ట్రంలో స్థానిక ఎన్నికలకు వెళ్తే ఊరుకోబోమన్నారు.
ఢిల్లీలో తమ పక్షాన కాంగ్రెస్ పోరాడితే దేశంలోని బీసీలంతా ఆ పార్టీకి అండగా ఉంటారన్నారు. బీసీ వ్యక్తి ప్రధానిగా ఉండి బీసీల డిమాండ్లను నెరవేర్చకపోవడం దురదృష్టకరమన్నారు. రిజర్వేషన్ల సాధనకు తెలంగాణ ఉద్యమ తరహలో పోరాటాలు నిర్వహిస్తామని స్పష్టం చేశారు. కార్యక్రమంలో బీసీ సంఘాల నాయకులు బైరి రవికృష్ణ, వడ్లకొండ వేణుగోపాల్ గౌడ్, డాక్టర్ సంగాని మల్లేశ్వర్, డాక్టర్ చిర్ర రాజుగౌడ్ పాల్గొన్నారు.
