హైదరాబాద్, వెలుగు: కరోనా టెస్టులకు ప్రైవేట్ హాస్పిటళ్లు ఇష్టారీతిగా రేట్లు అమలు చేస్తున్నాయి. జనం నుంచి భారీగా వసూళ్లకు పాల్పడుతున్నాయి. కొన్ని ప్రైవేట్ సెంటర్లలో పర్మిషన్ లేకుండానే టెస్టులు చేస్తున్నారు. సర్కార్ హాస్పిటళ్లు, సర్కార్ సెంటర్ల వద్ద భారీగా క్యూ లైన్లు ఉంటుండటంతో కరోనా అనుమానితులు ప్రైవేట్ సెంటర్లను ఆశ్రయిస్తున్నారు. దీంతో అందినకాడికి ప్రైవేటు సెంటర్లు దోచుకుంటున్నాయి. లాస్ట్ ఇయర్ ప్రైవేట్ సెంటర్లకు పర్మిషన్ ఇచ్చిన సమయంలో కరోనా టెస్ట్కు రూ. 2,250 గా ప్రభుత్వం నిర్ణయించింది. ఆ తర్వాత క్రమంగా రేట్లు తగ్గించింది. ప్రస్తుతం ప్రైవేట్ సెంటర్లలో రూ. 500కు ఆర్టీపీసీఆర్ టెస్టులు చేయాలి. కానీ కొన్ని సెంటర్లలోనే ఈ రేట్లకు టెస్టులు జరుగుతున్నాయి. కొన్ని సెంటర్లలో టెస్టు పేరుతో రూ. 850, పీపీఈ కిట్ల పేరుతో మరో రూ. 500 వసూలు చేస్తుండగా, మరికొన్ని హాస్పిటళ్లు నేరుగా రూ. 1,500 వరకు తీసుకుంటున్నాయి.
శివారు ప్రాంతాల్లో అధికం
గ్రేటర్ హైదరాబాద్లో ప్రభుత్వం దాదాపు 50 ప్రైవేటు సెంటర్లకే కరోనా టెస్టుల కోసం పర్మిషన్ ఇచ్చింది. కానీ ప్రస్తుతం 150కి పైగా ప్రైవేట్ సెంటర్లలో టెస్టులు జరుగుతున్నాయి. హైదరాబాద్ శివారు ప్రాంతాల్లో ఉన్న చిన్న చిన్న హాస్పిటళ్లు కూడా కరోనా టెస్టుల కోసం శాంపుల్స్ కలెక్ట్ చేస్తున్నాయి. టెస్టుల పర్మిషన్ ఉన్న సెంటర్లతో చేతులు కలిపి వీళ్లు టెస్టులను చేస్తున్నారు. రిపోర్టులు రెండు రోజుల తర్వాత ఇస్తున్నారు. ఇలా ఒక్కో హాస్పిటల్లో డైలీ 50కిపైగా శాంపుల్స్ కలెక్ట్ చేస్తున్నారు.
మా దృష్టికి తీసుకొస్తే చర్యలు తీసుకుంటం
ఎక్కడైనా ప్రైవేట్ సెంటర్లో రూ. 500 కంటే ఎక్కువ వసూలు చేస్తే తమ దృష్టికి తీసుకురావాలని హైదరాబాద్ జిల్లా డీఎంహెచ్వో డాక్టర్‌ వెంకటి చెప్పారు. బయట డబ్బులు పెట్టి చేయించుకోకుండా ప్రభుత్వాసుపత్రుల్లో యాంటిజెన్, ఆర్టీపీసీఆర్ టెస్టులు చేసుకోవాలని సూచించారు. అన్ని సెంటర్లలో టెస్టుల కోసం ఏర్పాటు చేశామని చెప్పారు.
