న్యూఢిల్లీ: మే 4 నుంచి భారీ స్థాయిలో లాక్డౌన్ మినహాయింపులు ఉండనున్నాయని కేంద్ర హోం శాఖ ప్రకటించింది. ప్రధాని నరేంద్ర మోడీ ప్రకటించిన దేశవ్యాప్త లాక్డౌన్ మే 3 న ముగియనున్న నేపథ్యంలో వచ్చే సోమవారం నుంచి కొత్త మార్గదర్శకాలు అమల్లోకి వస్తాయని హోంశాఖ బుధవారం రాత్రి ట్విట్టర్ ద్వారా తెలిపింది. కొత్త మార్గదర్శకాల వివరాలు త్వరలోనే వెల్లడిస్తామని ప్రకటించింది. దేశవ్యాప్త లాక్డౌన్ కారణంగా నెల రోజుల పాటు వివిధ ప్రదేశాల్లో చిక్కుకున్న లక్షలాది మంది వలస కార్మికులు, విద్యార్థులను సొంతూళ్లకు అనుమతించే ప్రణాలికను ఇప్పటికే కేంద్ర ప్రభుత్వం ప్రకటించింది. కరోనా రెడ్ జోన్లు, హాట్ స్పాట్లలో మాత్రం లాక్డౌన్ యథావిధిగా కొనసాగవచ్చని పేర్కొంది. లాక్డౌన్ సడలింపు చర్యలపై ప్రధాని మోడీ తుది నిర్ణయం తీసుకుంటారని అధికార వర్గాలు తెలిపాయి. దీనిని బట్టి చూస్తుంటే గ్రీన్ జోన్లలో మినహాయింపులు ఎక్కువ ఇస్తూనే రెడ్ జోన్లలో లాక్డౌన్ మరింత కఠినంగా అమలు చేయనున్నట్లు తెలుస్తోంది.
దేశవ్యాప్తంగా పదిహేను రోజుల్లో కరోనా హాట్స్పాట్లు, రెడ్ జోన్లుగా ప్రకటించిన జిల్లాల సంఖ్య 170 నుంచి 129 కి పడిపోయింది. ఇదే క్రమంలో గ్రీన్ జోన్లు కూడా 325 నుంచి 307 కి తగ్గాయి. అయితే ఆరెంజ్ జోన్లు మాత్రం 207 నుంచి 297 కు పెరిగాయి.
