గచ్చిబౌలి, వెలుగు: డ్రగ్స్ కేసు నిందితుల వద్ద స్వాధీనం చేసుకున్న డ్రగ్స్ ను పక్కదారి పట్టించి, వాటిని బహిరంగ మార్కెట్లో అమ్మేందుకు ప్రయత్నిస్తూ పట్టుబడిన సైబరాబాద్ సైబర్ క్రైమ్ ఎస్సై రాజేందర్ను అధికారులు సస్పెండ్ చేశారు. ఇప్పటికే రాజేందర్ ను రాయదుర్గం పోలీసులు అరెస్టు చేసి రిమాండుకు తరలించగా, తాజాగా అతన్ని సస్పెండ్ చేస్తూ సైబరాబాద్ కమిషనర్ స్టీఫెన్ రవీంద్ర ఉత్తర్వులు జారీ చేశారు. మరోవైపు ఈ కేసులో మరింత సమాచారం రాబట్టేందుకు రాజేందర్ ను కస్టడీ కోరుతూ రాయదుర్గం పోలీసులు పిటిషన్ దాఖలు చేశారు. దీంతో అతన్ని రెండు రోజుల కస్టడీకి కూకట్పల్లి కోర్టు అనుమతించింది.
సైబరాబాద్ కమిషనరేట్ పరిధిలోని సీసీఎస్ విభాగంలో ఎస్సైగా విధులు నిర్వహిస్తున్న రాజేందర్ తన టీమ్ తో కలిసి గతకొన్ని రోజుల క్రితం ముంబైలో ఓ డ్రగ్స్ రాకెట్ను చేధించారు. అక్కడ నైజీరియన్ వద్ద దొరికిన 1.700 గ్రాముల డ్రగ్స్ ను పక్కదారి పట్టించాడు. అనంతరం ఆయన ఆ డ్రగ్స్ ను బహిరంగ మార్కెట్లో విక్రయించేందుకు ప్రయత్నిస్తూ నార్కొటిక్ అధికారులకు పట్టుబడ్డాడు. కాగా, రాజేందర్ గతంలో రాయదుర్గం పోలీస్ స్టేషన్లో ఎస్ఐగా విధులు నిర్వహిస్తున్న సమయంలో లంచం తీసుకుంటూ ఏసీబీ అధికారులకు పట్టుబడి సస్పెన్షన్ కు గురయ్యాడు. అనంతరం హైకోర్టులో స్టే తెచ్చుకొని తిరిగి విధుల్లో చేరాడు. తాజాగా డ్రగ్స్ అమ్మేందుకు ప్రయత్నిస్తూ పట్టుబడి మరోసారి సస్పెండ్ అయ్యాడు.
