చేవెళ్ల: తాగి బండి నడపొద్దని పోలీసులు ఎంత మొత్తుకుంటున్నా జనం వినట్లేదు. డ్రంక్ అండ్ డ్రైవ్ చేస్తూ వాళ్లు ప్రమాదంలో పడటంతో పాటు ఇతరులకు హాని కలిగిస్తున్నారు. డ్రంక్ అండ్ డ్రైవ్ చేయొద్దంటూ ఓ వీడియోను ట్వీట్ చేశారు సైబరాబాద్ పోలీసులు. ఈ నెల నాలుగో తేదీ చేవెళ్లలోని ఇబ్రహీంపల్లి గేట్ దగ్గర ఓ వ్యక్తి మద్యం తాగి డేంజర్ గా బైక్ నడుపుతూ కింద పడ్డాడు. అదే రూట్ లో వెళ్తున్న వాహనదారులు ఆ మందుబాబుని లేపారు. తిరిగి మళ్లీ డ్రైవ్ చేస్తూ రోడ్డు మధ్యలోకి వెళ్లి అడ్డదిడ్డంగా బండి నడిపి ఇతర వాహనాలకు మళ్లీ మళ్లీ ఇబ్బంది కలిగించాడు. చివరికి వెళ్లి ఓ కారును గుద్దేశాడు. మద్యం మత్తులో బండి నడుపుతున్న అతడి వద్ద హెల్మెట్ ఉన్నా కూడా పెట్టుకోలేదు. దానిని బండి మిర్రర్‌‌కు తగిలించాడు. సీసీ కెమెరాలో రికార్డ్ అయిన ఈ ఘటన విజువల్స్‌ను ‘కృష్ణ గారి వీర డ్రైవింగ్ గాథ.. మద్యం మత్తులో’ అన్న ట్యాగ్‌ లైన్‌తో సైబరాబాద్ ట్రాఫిక్ పోలీసులు ట్వీట్ చేశారు. శుక్రవారం మధ్యాహ్నం 12.59కి ట్విట్టర్‌‌లో పోస్ట్ చేస్తే, సాయంత్రం నాలుగున్నరకే 15 వేల మందికిపైగా చూశారు. ఈ వీడియోపై నెటిజన్లు ఫన్నీగా స్పందిస్తున్నారు. ‘ఫన్నీ ఫెలో.. లక్కీగా బతికాడు’, ‘మద్యపానం నిషేధం చేయమంటే ప్రభుత్వం వినదు. మద్యం తాగి వెహికల్స్ ని నడపవద్దు అంటే ప్రజలు వినరు, ఎవడి గోల వాడిది’ అంటూ కొందరు కామెంట్లు చేస్తున్నారు.
కృష్ణ గారి వీర డ్రైవింగ్ గాథ… మద్యం మత్తులో
— CYBERABAD TRAFFIC POLICE సైబరాబాద్ ట్రాఫిక్ పోలీస్ (@CYBTRAFFIC) July 9, 2021
ఇబ్రహీంపల్లి గేట్, చేవెళ్ల. 04.07.2021#RoadSafety #RoadSafetyCyberabad pic.twitter.com/ZDJvlTjOV2
