Cyclone Akwaan: అక్వాన్ తుఫాను అలర్ట్.. నవంబర్ 20న ఏపీ, ఒడిశా తీరాలకు ముప్పు!

Cyclone Akwaan: అక్వాన్ తుఫాను అలర్ట్.. నవంబర్ 20న ఏపీ, ఒడిశా తీరాలకు ముప్పు!

బంగాళాఖాతంలో ఏర్పడిన తీవ్రమైన తుఫాను అక్వాన్ ఉత్తర ఆంధ్రప్రదేశ్, యానాం, దక్షిణ ఒడిశా తీరాల వైపు దూసుకొస్తోంది. నవంబర్ 20 మధ్యాహ్నానికి నర్సాపూర్‌–పూరీ మధ్య తీరాన్ని దాటే అవకాశం ఉందని భారత వాతావరణ శాఖ (IMD) వెల్లడించింది. తుఫాను ప్రభావంతో తీర ప్రాంతాల్లో బలమైన గాలులు వీచే ప్రమాదం ఉందని హెచ్చరించింది.

గంటకు 110 కి.మీ వేగంతో గాలులు

 తుఫాను ప్రస్తుతం ఉత్తర వాయువ్య దిశగా కదులుతోంది. నవంబర్ 20న తీరం దాటే సమయంలో గంటకు 90–100 కిలోమీటర్ల వేగంతో గాలులు వీచే అవకాశం ఉంది. గరిష్ఠంగా 110 కిలోమీటర్ల వేగంతో బలమైన గాలులు వీచవచ్చని IMD అంచనా వేసింది.

నవంబర్ 18 ఉదయం 11:30 గంటలకు తుఫాను దక్షిణ బంగాళాఖాతంలో కేంద్రీకృతమై ఉన్నట్లు వాతావరణ శాఖ తెలిపింది. ఇది నర్సాపూర్‌కు 540 కిలోమీటర్ల ఆగ్నేయంగా, చెన్నైకి 570 కిలోమీటర్ల తూర్పుగా, కాళింగపట్నానికి 600 కిలోమీటర్ల దక్షిణ ఆగ్నేయంగా, గోపాల్‌పూర్‌కు 690 కిలోమీటర్ల దక్షిణంగా, పూరీకి 750 కిలోమీటర్ల దక్షిణంగా ఉన్నట్లు వెల్లడించింది.

నవంబర్ 19 తర్వాత తగ్గనున్న తీవ్రత

నవంబర్ 18 సాయంత్రం 5:30 గంటల సమయానికి తుఫాను తీవ్రత మరింత పెరిగి గంటకు 100–110 కిలోమీటర్ల వేగంతో గాలులు వీచే అవకాశం ఉందని IMD అంచనా వేసింది. గరిష్ఠంగా 120 కిలోమీటర్ల వేగంతో గాలులు వీచవచ్చని పేర్కొంది.

అయితే నవంబర్ 19 తర్వాత తుఫాను క్రమంగా బలహీనపడే అవకాశం ఉంది. నవంబర్ 20న తీరం దాటే సమయానికి గాలుల వేగం గంటకు 60–70 కిలోమీటర్లకు తగ్గవచ్చని వాతావరణ శాఖ అంచనా వేస్తోంది.

తుఫాను బలహీనపడటానికి కారణాలివే!

తీర ప్రాంతానికి దగ్గరవుతున్న కొద్దీ చల్లని, పొడి గాలుల ప్రభావం, అధిక విండ్ షీర్ కారణంగా తుఫాను ముందుగానే కొంత బలహీనపడే అవకాశం ఉందని IMD వివరించింది. అయితే తుఫాను ప్రయాణ దిశ, తీవ్రత, ల్యాండ్‌ఫాల్ అయ్యే ఖచ్చితమైన ప్రాంతంపై ఇంకా కొంత అనిశ్చితి ఉందని స్పష్టం చేసింది. ప్రస్తుత అంచనాలకు మధ్యస్థ స్థాయి విశ్వాసం మాత్రమే ఉందని పేర్కొంది.

ALSO READ : కోట్ల ఆస్తులు.. ప్రతి నెలా లక్షల జీతాలు వదిలేసి..

మత్స్యకారులకు IMD కీలక హెచ్చరిక

తుఫాను ప్రభావం దృష్ట్యా బంగాళాఖాతంలోని ప్రభావిత ప్రాంతాల్లోకి మత్స్యకారులు చేపల వేటకు వెళ్లవద్దని వాతావరణ శాఖ హెచ్చరించింది. ఆంధ్రప్రదేశ్, యానాం, ఒడిశా తీర జిల్లాల ప్రజలు అప్రమత్తంగా ఉండాలని సూచించింది.ప్రజలు IMD అధికారిక వాతావరణ బులెటిన్లను ఎప్పటికప్పుడు పరిశీలించాలని, స్థానిక అధికారులు జారీ చేసే సూచనలు, హెచ్చరికలను తప్పనిసరిగా పాటించాలని స్పష్టం చేసింది.