కాలేజీకి రాలేదని నాలుగు రోజులు క్లాస్బయటే నిలబెట్టింది
స్పృహ తప్పి పడిపోయిన విద్యార్థిని
వేములవాడలో ఓ లెక్చరర్ తీరు
విధుల నుంచి తొలగించిన కలెక్టర్
వేములవాడ, వెలుగు : అనారోగ్యంతో కాలేజీకి రాని ఓ విద్యార్థినితో లెక్చరర్ అమానుషంగా ప్రవర్తించింది. ఐదు రోజులుగా క్లాస్ బయటే నిలబెట్టడంతో తట్టుకోలేక స్పృహ తప్పి పడిపోయింది. ఈ ఘటన రాజన్న సిరిసిల్ల జిల్లా వేములవాడలో జరిగింది. పెద్దపల్లి జిల్లా సుల్తానాబాద్ మండలం రేగడి మద్దికుంట గ్రామానికి చెందిన నిహారిక వేములవాడలోని సాంఘిక సంక్షేమ గురుకుల కాలేజీలో బీకాం కంప్యూటర్స్ ఫైనల్ ఇయర్ చదువుతోంది. ఆరోగ్యం బాగా లేకపోవడంతో హెల్త్ చెకప్ కోసం ఈ నెల18న ఒక్క రోజు సెలవు పెట్టి ఇంటికి వెళ్లింది. మళ్లీ 22న కాలేజీకి వచ్చింది. దీంతో ఇన్ని రోజులు ఎందుకు రాలేదని లెక్చరర్ మహేశ్వరి..నిహారికను వరుసగా ఐదు రోజుల పాటు క్లాసు బయట ఎండలో నిలబెట్టింది. అప్పటికే అనారోగ్యంతో ఉన్న నిహారిక బాధ తట్టుకోలేక స్పృహ తప్పి పడిపోయింది.దీంతో ఆమెను వేములవాడలో ఏరియా హాస్పిటల్ కు తరలించారు. బాధితురాలు మాట్లాడుతూ లెక్చరర్ పనిష్మెంట్తో తన కాళ్లలో స్పర్ష తెలియడం లేదని రోదించింది. ఈ విషయంపై వైస్ ప్రిన్సిపాల్ శ్యామలను వివరణ కోరగా ఘటన గురించి నిహారిక తమకు చెప్పలేదని, విచారణ జరిపి అధికారులకు నివేదిక పంపామని చెప్పారు.
కలెక్టర్ సీరియస్
నిహారికను బయట నిలబెట్టిన ఘటనపై కలెక్టర్ అనురాగ్ జయంతి సీరియస్ అయ్యారు. ఆమె హాస్పిటల్లో అడ్మిట్ కావడానికి కారణమైన కామర్స్ లెక్చరర్మహేశ్వరిని విధుల నుంచి తొలగించారు. అలాగే కాలేజీ ప్రిన్సిపాల్ మాతంగి కల్యాణిపై చర్యలు తీసుకోవాలని ఉన్నతాధికారులకు సిఫార్సు చేశారు. నిహారిక ఆరోగ్య పరిస్థితి గురించి ఆరా తీశారు.
