కేంద్ర ప్రభుత్వం ఇటీవల ఓటాన్ అకౌంట్ బడ్జెట్ ప్రవేశ పెట్టినందునే తామూ అదే పనిచేయాల్సి వచ్చిందని డిప్యూటీ సీఎం భట్టి విక్రమార్క వివరణ ఇచ్చారు. ఈ తరహా బడ్జెట్ తమకు ఇష్టం లేదని, అయితే వివిధ పథకాలకు కేంద్రం ఏ స్థాయిలో నిధులు విడుదల చేస్తుందో స్పష్టత లేదన్నారు.
ఎన్నికల తర్వాత కేంద్రంలో పూర్తి స్థాయి బడ్జెట్ ప్రవేశపెట్టిన అనంతరం తాము కూడా సరైన అంచనాలకు రాగలుగుతామని వివరించారు. కేంద్రం నుంచి రాష్ట్ర ప్రభుత్వానికి వచ్చే వాటాను చూసి రాష్ట్రంలోనూ పూర్తి స్థాయి బడ్జెట్ను ప్రవేశపెడతామని వెల్లడించారు. కేంద్ర పూర్తి బడ్జెట్ తర్వాత కొన్ని రంగాల కేటాయింపులు మరింత మెరుగ్గా ఉండే అవకాశాలున్నాయని భట్టి విక్రమార్క పేర్కొన్నారు.
