పెలోసీ పర్యటన మా సార్వభౌమత్వాన్ని కించపరిచింది: చైనా
బీజింగ్: తన అభ్యంతరాలను లెక్కపెట్టకుండా తైవాన్లో పర్యటించిన అమెరికా ప్రతినిధుల సభ స్పీకర్ నాన్సీ పెలోసీ, ఆమె కుటుంబంపై చైనా ఆంక్షలు విధించింది. తైవాన్లో పర్యటించరాదని ఎంతగా విజ్ఞప్తి చేసినా విననందుకు ఈ ఆంక్షలు విధించామని చైనా తెలిపింది. చైనాకు అమెరికా దౌత్యవేత్త క్రిస్బర్స్న్ ను పిలిపించుకుని నిరసన వ్యక్తం చేసింది. తైవాన్ జలసంధిలో నాలుగు రోజులపాటు సైనిక విన్యాసాలు నిర్వహిస్తామని క్రిస్కు చైనా విదేశీ మంత్రిత్వశాఖ స్పష్టంచేసింది. డిఫెన్స్, క్లైమేట్చేంజ్ తదితర అంశాలపై యూఎస్తో నిర్వహించాల్సిన చర్చలనుకూడా రద్దు చేసుకున్నామని ఓ ప్రకటనలో తెలిపింది. తమ భూభాగంలో తైవాన్ భాగమని చైనా వాదిస్తోంది. తమ అనుమతి లేకుండానే పెలోసీ.. తైవాన్లో అడుగుపెట్టడంతో అమెరికాపై చైనా ఆగ్రహంగా ఉంది. ‘‘మా అనుమతి లేకుండా తైవాన్లో పెలోసీ పర్యటించడం మా దేశ అంతర్గత వ్యవహారాల్లో తల దూర్చడమే అవుతుంది. చైనా సార్వభౌమత్వం, ప్రాదేశిక సమగ్రతను కూడా ఆమె పర్యటన కించపరచినట్లయింది. అందువల్లే పెలోసీ, ఆమె కుటుంబం మా దేశంలో పర్యటించకుండా నిషేధం విధించాం” అని చైనా విదేశీ మంత్రిత్వశాఖ పేర్కొంది.
జిన్పింగ్కు అవమానకరం: మీడియా
తైవాన్లో పెలోసీ పర్యటించకుండా అడ్డుకోవడంలో చైనా ప్రభుత్వం ఫెయిలైందని ఆ దేశ లోకల్మీడియాలో విమర్శలు వెల్లువెత్తాయి. ఆమె పర్యటన ప్రెసిడెంట్ షీ జిన్పింగ్ ఇమేజీకి అవమానకరమని మీడియాలో కథనాలు వచ్చాయి. కాగా, తైవాన్ నుంచి పెలోసీ వెళ్లిపోయిన తర్వాత తైవాన్ జలసంధిలో చైనా గురువారం సైనిక విన్యాసాలు చేసింది. ఈ విషయాన్ని తైవాన్ ధ్రువీకరించింది. చైనా సైనిక విన్యాసాలను అమెరికా విదేశాంగ శాఖ సెక్రటరీ ఆంటొనీ బ్లింకెన్ ఖండించారు.
పెలోసీపై ఆంక్షలు న్యాయమైనవే
అమెరికా ప్రతినిధుల సభ స్పీకర్ నాన్సీ పెలోసీ, ఆమె కుటుంబంపై తాము విధించిన ఆంక్షలు న్యాయమైనవే అని చైనా విదేశాంగ మంత్రిత్వశాఖ ప్రతినిధి హువా చున్యింగ్అన్నారు. పెలోసీ విషయంలో చైనా అతిగా ప్రవర్తించిందని వైట్హౌస్ నేషనల్సెక్యూరిటీ కౌన్సిల్ ప్రతినిధి జాన్కిర్బీ అంతకుముందు చేసిన వ్యాఖ్యలకు
చున్యింగ్ ఈవిధంగా స్పందించారు.
తైవాన్లో పర్యటించకుండా మమ్మల్ని అడ్డుకోలేరు: పెలోసీ
టోక్యో: అమెరికా అధికారులను తైవాన్లో పర్యటించకుండా చైనా అడ్డుకోలేదని అమెరికా స్పీకర్నాన్సీ పెలోసీ అన్నారు. తన ఆసియా టూర్చివరి రోజున ఆమె శుక్రవారం జపాన్లో పర్యటించారు. ఈ సందర్భంగా ఆమె మాట్లాడారు. వరల్డ్ హెల్త్ ఆర్గనైజేషన్లో చేరకుండా తైవాన్ను అడ్డగించి, ఏకాకిని చేయాలని చైనా ప్రయత్నించిందని అన్నారు. ‘‘తైవాన్కు బయటి ప్రపంచంతో సంబంధాలను చైనా తెంపవచ్చేమో కానీ మమ్మల్ని (అమెరికా అధికారులు) తైవాన్కు వెళ్లకుండా వారు (చైనా) అడ్డుకోలేరు” అని పెలోసీ వ్యాఖ్యానించారు.