భద్రాద్రికొత్తగూడెం, వెలుగు:కేంద్ర ప్రభుత్వ సంక్షేమ పథకాల అమలు తీరును సమీక్షించేందుకు ఏర్పాటు చేసిన దిశ రివ్యూ మీటింగ్ జాడ లేకుండా పోయింది. ప్రతి మూడు నెలలకోసారి నిర్వహించాల్సిన ఈ మీటింగ్ రెండేండ్లు కావొస్తున్నా నిర్వహించడం లేదు. ఈ మీటింగ్పై అధికారులతో పాటు ఇటు ప్రజాప్రతినిధులకు పట్టింపు లేకుండా పోయింది. కేంద్ర ప్రభుత్వ పథకాలు మనకెందుకు అనుకున్నారేమో అధికార టీఆర్ఎస్ పార్టీ ప్రజాప్రతినిధులు దిశ మీటింగ్ ఊసెత్తడం లేదు.
మూడు నెలలకోసారి వట్టిమాటే..
మహబూబాబాద్ ఎంపీ మాలోత్ కవిత అధ్యక్షతన జరిగే ఈ మీటింగ్లో కో చైర్మన్ ఖమ్మం ఎంపీ నామా నాగేశ్వర్రావుతో పాటు జిల్లాలోని ఎమ్మెల్యేలు, ఎమ్మెల్సీలు, జడ్పీటీసీలు, ఎంపీపీలు, కలెక్టర్, ఎస్పీ, జిల్లా ఉన్నతాధికారులు పాల్గొంటారు. ఈ మీటింగ్ను డీఆర్డీఏ అధికారులు సమన్వయం చేస్తుంటారు. జిల్లాలో రూ. కోట్ల కేంద్ర నిధులతో డెవలప్మెంట్ వర్క్స్ జరుగుతున్నాయి. మావోయిస్టు ప్రభావిత ప్రాంతాల అభివృద్ది నిధులు, సీఎస్ఆర్ ఫండ్స్తో పాటు ప్రత్యేక నిధులు, ఈజీఎస్, హాస్పిటల్స్లలో ఎన్ఆర్హెచ్ఎంతో చేపడుతున్న పనులు, ఆర్అండ్బీ, పంచాయతీరాజ్, అగ్రికల్చర్, ఎడ్యుకేషన్, స్వచ్ఛ భారత్, ఐసీడీఎస్, పౌర సరఫరాల శాఖ, రైల్వే, టెలికాం, ఫారెస్ట్, ఇతరత్రా శాఖల్లో కేంద్ర ప్రభుత్వం ద్వారా అమలవుతున్న పథకాలను రివ్యూ చేస్తుంటారు. గతంలో జరిగిన మీటింగ్పై సమీక్షిస్తారు. ఇంతటి కీలకమైన మీటింగ్ పట్ల ప్రజాప్రతినిధులు నిర్లక్ష్యంగా వ్యవహరిస్తుండడం పట్ల విమర్శలు వ్యక్తమవుతున్నాయి. ఎప్పటికప్పుడు సమీక్షిస్తేనే పనుల్లో జాప్యం, ఫండ్స్, శాఖల మధ్య సమన్వయం తదితర అంశాలను చర్చించే అవకాశం ఉంటుందని అంటున్నారు.
చివరి సారిగా 2020 నవంబర్లో దిశ మీటింగ్ నిర్వహించారు. జూన్ లో దిశ మీటింగ్ నిర్వహించేందుకు అధికారులు సన్నాహాలు చేయగా వరదలతో వాయిదా వేశారు. ఇటీవల దిశ మీటింగ్ పెట్టాలని ఖమ్మం ఎంపీ నామా నాగేశ్వర్రావు అధికారులకు సూచించినా చైర్మన్తో పాటు అధికారులు పట్టించుకోలేదు. జిల్లాలోని పాండురంగాపురం నుంచి భద్రాచలం రైల్వే లైన్, నేషనల్ హైవే పనుల్లో జాప్యం, ఇల్లందు, మణుగూరు హాస్పిటల్స్లో వైద్యులు, సిబ్బంది కొరత వంటి పలు అంశాలు చర్చించాల్సి ఉంది. ఇప్పటికైనా కమిటీ చైర్మన్తో పాటు కలెక్టర్ స్పందించి మీటింగ్ను నిర్వహించాలని ప్రజలతో పాటు పలువురు ప్రజాప్రతినిధులు కోరుతున్నారు.
