భద్రాద్రికొత్తగూడెం, వెలుగు : ఏప్రిల్, మే నెలల్లో తాగునీటి ఎద్దడి నివారణకు పక్కాగా ఏర్పాట్లు చేయాలని జిల్లా స్పెషల్ ఆఫీసర్ సురేంద్ర మోహన్ ఆఫీసర్లను ఆదేశించారు. తాగునీటి ఎద్దడిపై కలెక్టరేట్లో పలు శాఖల జిల్లా అధికారులతో కలెక్టర్ ప్రియాంక అల అధ్యక్షతన గురువారం మీటింగ్ నిర్వహించారు. తాగు నీటి ఎద్దడిపై జిల్లాలో తీసుకుంటున్న చర్యలపై సురేంద్రమోహన్ సంతృప్తి వ్యక్తం చేశారు.
ఈ సందర్భంగా ఆయన మాట్లాడుతూ ఎట్టి పరిస్థితుల్లో తాగునీటికి తిప్పలు రావొద్దని సూచించారు. గుత్తికోయల గ్రామాల్లో ప్రజలు చలిమ నీళ్లు తాగకుండా అవసరమైన చర్యలు చేపట్టాలన్నారు. ట్యాంకర్ల ద్వారా నీటి సరఫరాకు ప్లాన్ చేయాలని సూచించారు. దీనికి ఫారెస్ట్ ఆఫీసర్లు సహకరించాలన్నారు. తాగునీటి సమస్యలున్న ప్రాంతాలను వెంటనే గుర్తించాలని చెప్పారు. అన్ని శాఖల సమన్వయంతో నీటిఎద్దడి నివారణకు చర్యలు తీసుకోవాలన్నారు. ఈ ప్రోగ్రాంలో డీఆర్డీవో విద్యాచందన, మిషన్ భగీరథ సీఈ కే. శ్రీనివాసరావు, ఎస్ఈ సదాశివకుమార్, ఈఈ తిరుమలేశ్, ఇరిగేషన్ ఎస్ఈ శ్రీనివాస్రెడ్డి, పబ్లిక్ హెల్త్ ఈఈ రంజిత్, జడ్పీ సీఈవో ప్రసూన రాణి, భూగర్భ జల శాఖాధికారి బాలు, డీపీవో చంద్రమౌళి, మున్సిపల్ కమిషనర్లు పాల్గొన్నారు.
