కౌడిపల్లి, వెలుగు: కౌడిపల్లి సీహెచ్సీలో విధుల పట్ల నిర్లక్ష్యం వహించిన ముగ్గురు వైద్య సిబ్బందిని సస్పెండ్ చేస్తూ డీఎంహెచ్వో డాక్టర్ శ్రీరామ్ ఉత్తర్వులు జారీ చేశారు. ఫీల్డ్ విజిట్లో భాగంగా మంగళవారం కలెక్టర్ రాహుల్ రాజ్ కౌడిపల్లిలోని కమ్యూనిటీ హెల్త్ సెంటర్ ను ఆకస్మికంగా తనిఖీ చేశారు.
అటెండెన్స్ రిజిస్టర్ను పరిశీలించగా మల్టీ పర్పస్హెల్త్ అసిస్టెంట్లు కే. రమేశ్, రాధాకృష్ణ, ఎంపీహెచ్ఈవో అబ్దుల్ షకీల్ రిజిస్టర్లో సంతకం చేసి విధులకు హాజరు కానట్టు గుర్తించారు. దీనిపై ఆగ్రహం వ్యక్తం చేసిన ఆయన విధుల పట్ల బాధ్యత రాహిత్యంగా వ్యవహరిస్తున్న ఆ ముగ్గురు సిబ్బందిని సస్పెండ్ చేయాలని డీఎంహెచ్వోను ఆదేశించారు. ఈ మేరకు ఆయన ఉత్తర్వులు జారీ చేశారు.
