కరోనా కలవరం ఇప్పట్లో తగ్గేలాలేదు. డెల్టాప్లస్ వేరియంట్ ప్రభావం తగ్గుతుంది అనుకునే లోపే ఒమిక్రాన్ రూపంలో కొత్తరకం వచ్చేసింది. ఈ కొత్తరకం వైరస్ ఇన్ఫెక్షన్ తీవ్రత ఎలా ఉంటుందనేది పక్కాగా చెప్పలేకపోతున్నారు రీసెర్చర్లు. దాంతో వ్యాక్సిన్ వేసుకున్నా కూడా కరోనా సోకుతుందేమోనన్న భయం మొదలైంది చాలామందిలో. అయితే కరోనా జాగ్రత్తలు పాటిస్తూ, అలర్ట్గా ఉండడం ద్వారా ఒమిక్రాన్ బారి నుంచి తప్పించుకోవచ్చు అంటున్నారు డాక్టర్ రాహుల్ అగర్వాల్. దక్షిణాఫ్రికాలో బయటపడ్డ ఒమిక్రాన్ వేరియంట్ చూస్తుండగానే అన్నిదేశాల్ని చుట్టేస్తోంది. ఇంతకుముందు ఉన్న కరోనా వేరియంట్లతో పోల్చితే ఒమిక్రాన్ వేరియంట్కు స్పీడ్ ఎక్కువ. ఫాస్ట్గా వ్యాపిస్తూ.. అంతే తొందరగా ఇన్ఫెక్ట్ చేస్తుంది కూడా. దీనిలో 50కి పైగా మ్యుటెంట్స్, వీటిలో 30 రకాలు ‘స్పై’ ప్రొటీన్ (కరోనా వ్యాక్సిన్లు పనిచేసేది ఈ ప్రొటీన్మీదనే) లోనే కనిపించాయని రీసెర్చర్లు చెబుతున్నారు. ‘స్పై’ ప్రొటీన్లో మార్పుల వల్ల ఒమిక్రాన్ వైరస్ ఇన్ఫెక్షన్, తీవ్రత ఎంత ఉంటుందనేది కచ్చితంగా నిర్ధారణకు రాలేకపోతున్నారు. ఈ కొత్తరకం వేరియంట్ మిగతావాటికంటే ఎక్కువ ఇంపాక్ట్ చూపిస్తుందని, మ్యుటేషన్ల కారణంగా దీనిపై వ్యాక్సిన్, ఇమ్యూనిటీ ప్రభావం తక్కువని ప్రపంచ ఆరోగ్య సంస్థ, సెంటర్ ఫర్ డిసీజ్ కంట్రోల్ అండ్ ప్రివెన్షన్ (సిడిసి) చెప్తు న్నాయి. అంతేకాదు చిన్నపిల్లలు, పెద్దవాళ్ల మీద ఈ వైరస్ ఎఫెక్ట్ ఎలా ఉంటుందనేది ఇప్పుడే చెప్పలేం.
ఒకేసారి వందమందికి
మనదగ్గర చాలామంది సెకండ్ డోస్ తీసుకున్నారు. అయితే, ఇప్పటికీ ఫస్ట్ డోస్ వ్యాక్సిన్ తీసుకోని వాళ్లు ఉన్నారు. సెకండ్ డోస్ తీసుకున్నవాళ్లకి సివియర్ కొవిడ్ వచ్చే ఛాన్స్ 93–95 శాతం తక్కువని, ఒమిక్రాన్ అయితే 70 శాతం తక్కువని అమెరికన్ ఫార్మా కంపెనీ ఫైజర్ స్టడీలో తేలింది. అయితే ఇప్పటికీ వందలో 20–30 మందికి సివియర్ కొవిడ్ వచ్చే ఛాన్స్ ఉంది. ఒకప్పుడు పదిమందికి కరోనా ఇన్ఫెక్షన్ వచ్చేది. కానీ ఇప్పుడు ఒకేసారి వందమందికి ఇన్ఫెక్షన్ వచ్చేస్తుంది.
ఒమిక్రాన్ కేసుల్లో...
ఇప్పటి వరకు కరోనా సోకని వాళ్లకి ఒమిక్రాన్ ఇన్ఫెక్షన్ వచ్చే ఛాన్స్ ఉంది. ఈ సారి ఫ్రెష్ కొవిడ్ ఇన్ఫెక్షన్లు ఎక్కువ కనిపిస్తున్నాయి. వ్యాక్సిన్ వేసుకున్న వాళ్లకి కూడా ఒమిక్రాన్ సోకవచ్చు. కరోనా నుంచి కోలుకున్నవాళ్లలో యాంటీ బాడీలు ఉంటాయి. అయితే 3 నెలల తర్వాత వాటి ప్రభావం తగ్గిపోతుంది. దాంతో వాళ్లు కూడా ఒమిక్రాన్ బారిన పడే ఛాన్స్ ఉంది. అయితే, ఒమిక్రాన్తో రీ–ఇన్ఫెక్షన్ వచ్చిందంటే పరిస్థితి ఎలా ఉంటుందనేది చెప్పలేం. చలికాలంలో వచ్చే జలుబు, దగ్గు, జ్వరం వంటివి కూడా ఒమిక్రాన్ ఇన్ఫెక్షన్ రిస్క్ని పెంచుతాయి.
లక్షణాలు
ఒమిక్రాన్ వచ్చిన వాళ్లలో గొంతునొప్పి, జ్వరం, అలసట, తలనొప్పి వంటి లక్షణాలుంటాయి. ఒమిక్రాన్ లక్షణాల తీవ్రత డెల్టా వేరియంట్తో పోల్చితే ఎలా ఉంటుందన్నది ఇప్పుడే చెప్పలేం.
ట్రీట్మెంట్
కరోనా సోకిన వాళ్లకి రకరకాల ట్రీట్మెంట్లు అందుబాటులో ఉన్నాయి. వీటన్నింటిలో మోనోక్లోనల్ యాంటీ బాడీస్, స్టిరాయిడ్స్ బాగా పనిచేస్తున్నాయి. ఒమిక్రాన్ ఇన్ఫెక్షన్ని తగ్గించడానికి కూడా ఇవే ట్రీట్మెంట్లు ఉపయోగిస్తున్నారు చాలామంది. అయితే, ఇప్పటివరకు ఉన్న ట్రీట్మెంట్లలో ఏదీ పక్కాగా పనిచేస్తుందని, వంద శాతం‘యాంటీ–కొవిడ్’ అని చెప్పలేమని చాలా స్టడీలు అంటున్నాయి.
బూస్టర్ డోస్ అవసరం
బూస్టర్ డోస్ని టెటనస్, డిఫ్తీరియా వంటి జబ్బులు ఉన్నవాళ్లకి ఇస్తున్నాం. అయితే, మొదటిసారి కరోనా వచ్చిన వాళ్లకి ట్రీట్మెంట్ చేసే డాక్టర్లు, సేవలు చేసే నర్సులకి, చాలాకాలంగా అనారోగ్యంతో బాధపడుతున్నవాళ్లకి బూస్టర్ డోస్ చాలా అవసరం. ఎందుకంటే.. కరోనా వ్యాక్సిన్ రెండు డోసులు తీసుకున్నా కూడా ఒమిక్రాన్ సోకే అవకాశం ఉంది.
ఈ జాగ్రత్తలు ముఖ్యం
జలుబు, దగ్గు వంటి లక్షణాలు ఉంటే వెంటనే డాక్టర్ని కలవాలి. కరోనా టెస్ట్ చేయించుకోవాలి. బయటికి వెళ్లినప్పుడు మాస్క్ పెట్టుకోవాలి. తుమ్మినా, దగ్గినా ముక్కుకి అడ్డంగా రుమాలు పెట్టుకోవాలి. జనం ఎక్కువగా ఉండే ప్లేస్లకి వెళ్లొద్దు. చేతులు తరచూ శుభ్రం చేసుకుంటూ ఉండాలి. శానిటైజర్ రాసుకోవడం మర్చిపోవద్దు. ఇమ్యూనిటీని పెంచే పండ్లు, కూరగాయలు ఎక్కువ తినాలి.
