కోవర్జిన్... ఈమధ్య ఇంగ్లీషు డిక్షనరీలో కొత్తగా చేరిన పదం ఇది. కరోనా కాలంలో పుట్టుకొచ్చిన ఈ పదానికి ఇప్పటివరకు కరోనా సోకనివాళ్లు అని అర్థం. ఫస్ట్, సెకండ్వేవ్లో కరోనా బారిన పడనివాళ్లు కొందరు ఉన్నారు. వీళ్లలో చాలామందికి థర్డ్వేవ్లో కరోనా వచ్చింది. అయితే, ఇప్పటికీ కొందరికి ఒక్కసారి కూడా కరోనా రాలేదు. వీళ్లే ‘కోవర్జిన్స్’. ఆశ్చర్యం ఏమంటే... కరోనా బారిన పడకుండా వీళ్లేం చేస్తున్నారనేది వీళ్లకి కూడా తెలియదు. కోవర్జిన్స్ని ఫ్రెండ్స్ పాపులర్ సినిమా క్యారెక్టర్ల పేర్లతో పిలుస్తుంటారు. దాంతో, కొందరు కోవర్జిన్స్ ‘మా ఇమ్యూనిటీ చాలా స్ట్రాంగ్’, మేం సూపర్హీరోలం’ అని అనుకుంటారు. కోవర్జిన్లో ఒక్కొక్కరు ఒక్కోరకం.
కనిపించని కోవర్జిన్స్
కరోనా టైమ్లో చాలామంది వర్క్ ఫ్రమ్ హోమ్ చేశారు. ఇంటిదగ్గర ఉన్నా కొందరికి కరోనా వచ్చింది. కానీ, ఆఫీస్కి వెళ్లి పనిచేసినా కూడా కొందరికి కరోనా రాలేదు. దాంతో వీళ్లు ‘మేము కరోనా వైరస్కి కనిపించం’ అనుకుంటారు.
డౌట్ఫుల్ కోవర్జిన్స్
‘కరోనా వచ్చిందా?’ అని ఎవరైనా అడిగితే... ‘నాకు ఇప్పటివరకు కరోనా రాలేదంటే నమ్మలేకపోతున్నా. కొన్నిరోజులు గొంతు నొప్పిగా అనిపించింది. కానీ, తొందరగా తగ్గిపోయింది. అప్పుడే కరోనా వచ్చి, పోయిందేమో’ అంటారు వీళ్లు.
కోవిడ్ ఫోమో
ఫోమో అంటే ‘ఫియర్ ఆఫ్ మిస్సింగ్ అవుట్’. అలాగని పార్టీలు, ఫేమస్ టీవీ షోలు మిస్ అయ్యామని కాదు. కరోనా రాలేదనే ఫీలింగ్ని ‘కోవిడ్ ఫోమో’ అంటారు. ‘మా ఫ్రెండ్స్కి కరోనా వచ్చింది. నాకూ పాజిటివ్ వస్తే బాగుండు’ అనుకుంటున్నారట కొంతమంది కోవర్జిన్స్. ఎందుకంటే... ‘మా రోజుల్లో కరోనా ప్యాండెమిక్ వచ్చింది. మేము కూడా ఇన్ఫెక్ట్ అయ్యాం. కోలుకున్నాం’ అని తర్వాతి తరానికి చెప్పుకునేందుకు కరోనా రావాలని కోరుకుంటున్నారు వీళ్లు.
పారనాయిడ్ కోవర్జిన్
ఇప్పటివరకు కరోనా రాకున్నా కూడా... కరోనా వస్తుందేమోనని భయపడతారు కొందరు. ఆ భయంతో మళ్లీమళ్లీ ఆర్టి–పిసిఆర్ టెస్ట్ చేయించుకుంటుంటారు.
నలుగురిలో కలవరు. పదే పదే చేతులు కడుక్కుంటారు. అంతేకాదు ఇంట్లో ఉన్నా మాస్క్ పెట్టుకుంటారు.
కొవిడియోట్ కోవర్జిన్స్
కొత్త వేరియెంట్లు వచ్చినా కూడా కొందరికి కరోనా రాలేదు. దాంతో, మాస్క్ పెట్టుకున్నా, పెట్టుకోకున్నా ఏం కాదు? అని కొందరు కోవర్జిన్స్ మాస్క్ పక్కన పడేస్తున్నారు. అంతేకాదు కరోనా సోకిన వాళ్లకి దూరంగా కూడా ఉండడం లేదు వీళ్లు.