- కాశ్మీర్లోని మారుమూల గ్రామం కేరాన్ పీహెచ్సీలో ఘటన
కేరాన్: కాశ్మీర్లోని మారుమూల పల్లెలో ప్రసవ వేదన అనుభవిస్తున్న గర్భిణికి.. గైనకాలజిస్ట్ వీడియోకాల్లో డాక్టర్ ను ఫాలో అవుతూ పీహెచ్సీ సిబ్బంది డెలివరీ చేశారు. ఈ ఘటన కుప్వారా జిల్లాలోని కేరాన్ గ్రామంలో శుక్రవారం రాత్రి చోటుచేసుకుంది. పీహెచ్సీకి సమీపంలోని క్రాల్పోరా సబ్ డిస్ట్రిక్ట్ ఆస్పత్రికి వెళ్లే రోడ్డు సరిగ్గా లేదు. రాత్రి కూడా కావడంతో వెంటనే గర్భిణిని అక్కడికి తీసుకెళ్లే చాన్స్ లేకుండాపోయింది. దీంతో ఏం చేయాలో అర్ధంకాక.. కేరాన్ పీహెచ్సీ సిబ్బంది వెంటనే క్రాల్పోరా ఆస్పత్రి డాక్టర్ పర్వేజ్కు వాట్సాప్ వీడియో కాల్ చేశారు. ఆయన ఫోన్లో సూచనలు చెబుతుంటే పీహెచ్సీ స్టాఫ్ డెలివరీ చేశారు. ఆడ శిశువుకు ఆ మహిళ జన్మనిచ్చింది. తల్లీ,బిడ్డ ఇద్దరూ క్షేమంగానే ఉన్నారు.
