- లివింగ్ సెల్స్ ఆధారంగా చెవి రూపకల్పన
- అమెరికాలో క్లినికల్ ట్రయల్స్
- మైక్రోషియాతో బాధపడే వారికి ప్రయోజనం
న్యూయార్క్: అమెరికా డాక్టర్లు అరుదైన ఆపరేషన్ చేశారు. ఓ యువతికి త్రీడీ ప్రింటెడ్ చెవిని ట్రాన్స్ప్లాంటేషన్ ద్వారా విజయవంతంగా అమర్చారు. ఆ యువతి లివింగ్ సెల్స్ నే ఉపయోగించి ఈ చెవికి డాక్టర్లు రూపకల్పన చేశారు. ఇలా చెవిని ట్రాన్స్ ప్లాంట్ చేయించుకున్న తొలి వ్యక్తి ఈమే కావడం గమనార్హం. త్రీడీ బయో థెరప్యూటిక్స్ అనే రిజనరేటివ్ మెడిసిన్ కంపెనీ తొలిసారిగా ఈ క్లినికల్ ట్రయల్స్ నిర్వహించింది. మెక్సికోకు చెందిన అలెక్సా(20)కి పుట్టుకతోనే కుడి చెవి చిన్నగా.. సరైన ఆకృతి లేకుండా ఉండేది. దీనినే మైక్రోషియా అని కూడా అంటారు. ఆ యువతి లివింగ్ సెల్స్ ఆధారంగా పేషెంట్కు సంబంధించిన త్రీడీ ప్రిటింగ్ చెవిని ఈ సంస్థ రూపొందించింది. ఇది విజయవంతం కావడంతో మైక్రోషియాతో బాధపడే మరింత మంది రోగులకు ఈ టెక్నాలజీని ఉపయోగించి కొత్త జీవితం ఇవ్వొచ్చని సైంటిస్టులు భావిస్తున్నారు. మైక్రోషియా అంటే పుట్టుకతోనే ఒకటి లేదా రెండు చెవులు లేకపోవడం లేదా చెవి సరిగ్గా రూపుదిద్దుకోకపోవడం. అయితే ఈ త్రీడీ ప్రింటింగ్ చెవి సహజమైనదిలాగే ఉంటుందని, స్పర్శ అనుభూతి కలుగుతుందని త్రీడీ బయో థెరప్యూటిక్స్ వివరించింది. టెక్సాస్ రాష్ట్రం శాన్ ఆంటోనియోలోని మైక్రోషియా–కంజెనిటల్ ఇయర్ డిఫర్మిటీ ఇనిస్టిట్యూట్కు చెందిన ఇయర్ రియర్ రికనస్ట్రక్టివ్ సర్జన్ డాక్టర్ ఆర్టురో బోనిల్లా ఆధ్వర్యంలో ఈ ప్రక్రియను పూర్తి చేసినట్టు ఆ సంస్థ వెల్లడించింది. మైక్రోషియా రోగుల బయటి చెవిని కోసం ఆరినోవో అనే పద్ధతిని ఉపయోగించి ఇయర్ ఇంప్లాంట్ చేసినట్టు తెలిపింది. ‘‘ఒక ఫిజిషియన్గా నేను ఎంతో మంది మైక్రోషియా పేషెంట్లకు ట్రీట్ మెంట్ చేశాను. ఈ టెక్నాలజీ మైక్రోషియా పేషెంట్లు, వారి కుటుంబ సభ్యులకు ఎంత కీలకమో నాకు తెలుసు. అందుకే ఈ టెక్నాలజీ నన్ను ఇన్స్పైర్ చేసింది. రోగి సొంత కార్టిలేజ్ కణాలను ఉపయోగించిన ఈ కొత్త విధానం ఎంత సురక్షితం అనే దానిని తెలుసుకోవడానికి ఈ స్టడీ మాకు ఉపయోగపడుతుంది. ఇది మైక్రోషియా పేషెంట్లలో ఆత్మవిశ్వాసాన్ని, నమ్మకాన్ని పెంచుతుంది”అని డాక్టర్ ఆర్టురో బోనిల్లా చెప్పారు. కాగా, ఇది చరిత్రాత్మకమైన ఘట్టమని, ఈ క్లీనికల్ ట్రయల్స్ మైక్రోషియాతో బాధపడేవారికే కాకుండా ఇతరులకు ఉపయోగపడాయని తాను భావిస్తున్నానని త్రీడీ బయో చీఫ్ ఎగ్జిక్యూటివ్ డాక్టర్ డేనియల్ కోమెన్ చెప్పారు.
