- మెదక్ ఆర్టీసీ డీఎం, సీఐ వేధిస్తున్నరు
- ఇబ్బందులు పట్టించుకోకుండా డ్యూటీలు వేస్తున్నరు
- ఆర్టీసీ డ్రైవర్ల ఆరోపణ
- విధులు బహిష్కరించి ఆందోళన
మెదక్టౌన్, వెలుగు : మెదక్ఆర్టీసీ డిపోలో డీఎం, సీఐ తమ ఇబ్బందులను పట్టించుకోకుండా డ్యూటీలు వేస్తున్నారని ఆరోపిస్తూ శుక్రవారం డ్రైవర్లు విధులు బహిష్కరించి డిపో ఎదుట ఆందోళనకు దిగారు. ఈ సందర్భంగా వారు మాట్లాడుతూ మెదక్ఆర్టీసీ డీఎం సుధ, సీఐ వీరబాబు12 గంటలు విధులు నిర్వహించినప్పటికీ రెస్ట్ ఇవ్వడం లేదని, టిమ్స్ డ్రైవర్లను అనేక ఇబ్బందులకు గురి చేస్తున్నారని ఆవేదన వ్యక్తం చేశారు. వారం కింద తమ సమస్యలు పరిష్కరించాలని డిపో మేనేజర్కు నోటీస్ ఇచ్చామన్నారు. అలాగే ఇంటి వద్ద పది గంటలు కూడా ఉండలేని పరిస్థితి నెలకొందన్నారు.
హోటల్లో తిని డిపోలో పడుకుని డ్యూటీ చేస్తున్నామన్నారు. కుటుంబసభ్యులు, బంధువులు చనిపోతే డీఎంకు, సీఐకి సమాచారం ఇవ్వడంతోనే సరిపోదని అందుకు సంబంధించిన ఫొటోలు పంపాలని వేధిస్తున్నారన్నారు. ఈ విషయమై మెదక్డిప్యూటీ ఆర్ఎం దైవాదీనం, డీఎం సుధను వివరణ కోరగా డిపోలోని డ్రైవర్లకు అన్ని డిపోల మాదిరిగానే డ్యూటీలు వేస్తున్నామని, వారు చేసే ఆరోపణలు అవాస్తవమన్నారు. డ్రైవర్లతో చర్చలు జరుపుతున్నామని, శనివారం నుంచి విధుల్లోకి వచ్చే అవకాశం ఉందన్నారు.
