- రూ.12 కోట్ల విలువైన డ్రగ్స్ స్వాధీనం.. కీలక వ్యక్తి అరెస్ట్
- ఢిల్లీ కమిషనరేట్‌‌‌‌‌‌‌‌లో వివరాలు వెల్లడించిన తెలంగాణ ఈగల్ టీమ్‌
న్యూఢిల్లీ, వెలుగు: కొరియర్ ద్వారా ఢిల్లీ నుంచి తెలంగాణకు డ్రగ్స్ సరఫరా అవుతున్నట్లు తెలంగాణ యాంటీ నార్కోటిక్స్‌ బ్యూరో (ఈగల్) తెలిపింది. ఈ క్రమంలో ఇటీవల ఢిల్లీ, గ్రేటర్ నోయిడా, గ్వాలియర్‌, విశాఖపట్నంలో సోదాలు నిర్వహించి అంతర్జాతీయ డ్రగ్స్ ముఠా గుట్టును ఈగల్ టీమ్‌ రట్టు చేసింది.
ఢిల్లీ పోలీసులతో కలిసి తెలంగాణ ఈగల్ టీం చేపట్టిన ఈ భారీ ఆపరేషన్‌‌‌‌‌‌‌‌లో కీలక ఆధారాలు సేకరించింది. ఈ దాడుల్లో రూ.12 కోట్ల విలువైన డ్రగ్స్ స్వాధీనం చేసుకుంది. శుక్రవారం ఢిల్లీ పోలీస్ హెడ్ క్వార్టర్స్‌‌‌‌‌‌‌‌లో దీనికి సంబంధించిన వివరాలను తెలంగాణ ఈగల్ టీం ఎస్పీ సీతారాంతో కలిసి ఢిల్లీ క్రైం బ్రాంచ్ జాయింట్ కమిషనర్ సురేంద్ర కుమార్ వెల్లడించారు.
నైజీరియన్ డ్రగ్ ముఠాపై ఢిల్లీ-, తెలంగాణ పోలీసుల జాయింట్ ఆపరేషన్ నిర్వహించినట్లు చెప్పారు.ఈ ఆపరేషన్‌‌‌‌‌‌‌‌లో 18 ప్రాంతాల్లో సోదాలు నిర్వహించామని వెల్లడించారు. గ్రేటర్ నోయిడాలో డ్రగ్స్ ఆర్థిక వ్యవహారాలు చూసే బద్రుద్దీన్ అనే కీలక వ్యక్తిని అరెస్ట్ చేసినట్లు తెలిపారు. డ్రగ్స్ కేసులో 10 మందిని అరెస్ట్ చేయగా, వీరిలో ఢిల్లీ, నైజీరియన్, ఉగాండకు చెందిన వారున్నట్లు తెలిపారు.
అలాగే.. వీసా గడువు ముగిసిన మరో 30 మందిని కూడా అదుపులోకి తీసుకున్నట్లు చెప్పారు. తెలంగాణలో నమోదైన కేసుల ఆధారంగా వారిని అరెస్ట్ చేశామని వెల్లడించారు. డ్రగ్స్ కంట్రోల్‌‌‌‌‌‌‌‌లో తెలంగాణ ఈగల్ టీం కృషిని ఢిల్లీ జాయింట్ కమిషనర్ అభినందించారు. మరోవైపు, కొరియర్ ద్వారా ఢిల్లీ నుంచి తెలంగాణకు డ్రగ్స్ సరఫరా అవుతుందని ఈగల్ టీమ్‌‌‌‌‌‌‌‌కు చెందిన ఎస్పీ సీతారాం తెలిపారు.
షూబేస్, షర్ట్ కాలర్‌‌‌‌‌‌‌‌‌‌‌‌‌‌‌‌లో ఉంచి డ్రగ్స్‌‌‌‌‌‌‌‌ను కొరియర్ చేసేవారని వెల్లడించారు. తెలంగాణ పోలీసుల నమోదు చేసిన కేసు ఆధారంగా ఢిల్లీ పోలీసులతో సంయుక్త ఆపరేషన్ చేపట్టి, నిందితులను అరెస్ట్ చేశామని చెప్పారు. తెలంగాణలోని 1,975 మంది వినియోగదారులకు వీరు డ్రగ్స్ సప్లై చేస్తున్నారని గుర్తించినట్లు వెల్లడించారు. గత రెండు నెలల్లో రూ.5 కోట్ల లావాదేవీలు జరిగాయన్నారు.
