సెల్ఫీలు.. ఇప్పుడు బాగా నడుస్తున్న ట్రెండ్. 2013లో బాగా ఫేమస్ అయిన ఆ పదానికి ఆక్స్ఫర్డ్ డిక్షనరీ చోటు కూడా కల్పించింది. కానీ, 180 ఏళ్ల క్రితమే సెల్ఫీ ఉందన్న సంగతి తెలుసా? జూన్ 21ని ‘నేషనల్ సెల్ఫీ డే’గా జరుపుకుంటారన్న విషయం తెలుసా? దాదాపు చాలా మందికి తెలిసుండదు. 1839 అక్టోబర్లో ఫిలడెల్ఫియాకు చెందిన రాబర్ట్ కార్నెలియస్ అనే ఫొటోగ్రాఫర్ తన ఇంటి పెరట్లో సెల్ఫీ తీసుకున్నాడు. అదే ఏడాది లూయిస్ జాక్వెస్ మాండి డాగ్వెరో అనే ఫొటోగ్రాఫర్, సెల్ఫీలు తీసుకునే ‘డాగ్వెరోటైపీ’ని కనిపెట్టాడు. కానీ, దానికి రెండు నెలల ముందే కార్నెలియస్ సెల్ఫీ తీసుకున్నాడు.
లైబ్రరీ ఆఫ్ కాంగ్రెస్ ప్రకారం రెండు లెన్సులున్న ఓ పెద్ద కెమెరా బాక్సును ముందు పెట్టి, టైమ్ అడ్జస్ట్ చేసి సెల్ఫీ క్లిక్మనిపించాడట. నిజానికి అప్పట్లో లైటింగ్ అడ్జస్ట్మెంట్కే కెమెరా 3 నుంచి 15 నిమిషాలు తీసుకునేదట. దాదాపు అంతసేపు కార్నెలియస్ సెల్ఫీ కోసం పోజ్ పెట్టి ఎదురుచూసి ఉంటాడని అంటున్నారు. ప్రస్తుతం ఫోన్ను పట్టుకుని ముందు కెమెరాతో తమంతట తాము తీసుకునే ఫొటోను సెల్ఫీగా పిలుస్తున్నాం. కానీ, అప్పట్లో కెమెరాలు చాలా పెద్దవిగా ఉండడం వల్ల జస్ట్ అక్కడ పెట్టి టైమింగ్ అడ్జస్ట్మెంట్ ద్వారా సెల్ఫీలు తీసుకునేవారు. ఫస్ట్ సెల్ఫీ తీసుకున్న వ్యక్తిగా కార్నెలియస్ పేరిట గిన్నిస్ రికార్డు కూడా ఉంది. ఇప్పుడున్న టెక్నాలజీతో పోలిస్తే అప్పట్లోనే ఈ ఫీట్ సాధించడం గొప్పే కదా!
