న్యూఢిల్లీ: ఇండియా, న్యూజిలాండ్ మధ్య ఫ్రీ ట్రేడ్ అగ్రిమెంట్కు సంబంధించిన చర్చలు విజయవంతం అయ్యాయి. రానున్న 3 నెలల్లో అధికారికంగా డాక్యుమెంట్లపై సంతకాలు చేసే అవకాశం ఉంది. ఆ తర్వాత ఇది అమల్లోకి రానున్నది. ప్రధాని నరేంద్ర మోదీ, న్యూజిలాండ్ ప్రధాని క్రిస్టోఫర్ లక్సన్ సోమవారం ఫోన్ ద్వారా చర్చించి ఈ నిర్ణయం తీసుకున్నారని ఇరు దేశాల ప్రతినిధులు సంయుక్తంగా ప్రకటించారు. 2025, మార్చి 16న క్రిస్టోఫర్ ఇండియా పర్యటనకు వచ్చారు. ఆ సమయంలో ఫ్రీ ట్రేడ్ అగ్రిమెంట్ అంశం తెరపైకి వచ్చింది.
ఇరు దేశాల ప్రతినిధులు పలుమార్లు చర్చించుకున్నారు. 9 నెలల్లోనే డీల్ను ఫైనల్ చేశారు. ఫ్రీ ట్రేడ్ అగ్రిమెంట్ అమల్లోకి వస్తే.. ఇండియా నుంచి న్యూజిలాండ్కు ఎగుమతయ్యే వస్తువులపై ఎలాంటి సుంకాలు ఉండవు. దీంతో ఇండియన్ గూడ్స్ అక్కడ చౌకగా లభిస్తాయి. న్యూజిలాండ్ నుంచి ఇండియాకు 95% ఎక్స్పోర్ట్లపై టారిఫ్లు తగ్గుతాయి లేదంటే మొత్తానికి తొలగించే అవకాశం ఉంది. ఇందులో 57% ప్రొడక్ట్లు డే వన్ నుంచి డ్యూటీ ఫ్రీ అవుతాయి. వచ్చే 15 ఏండ్లలో న్యూజిలాండ్ మన దేశంలో రూ.1.70 లక్షల కోట్ల పెట్టుబడులు పెట్టడానికి అంగీకరించింది.
మన స్టూడెంట్లు ఎంతమందైనా వెళ్లొచ్చు
ఇండియన్ స్కిల్డ్ ప్రొఫెషనల్స్ కోసం ప్రత్యేకంగా 5 వేల తాత్కాలిక ఉపాధి వీసాలను న్యూజిలాండ్ కేటాయించింది. ఇందులో ఐటీ, ఇంజనీరింగ్, హెల్త్కేర్, కన్స్ట్రక్షన్ రంగాల వారికి ప్రాధాన్యం ఉంటుంది. ఆయుష్ ప్రాక్టీషనర్లు, యోగా ఇన్స్ట్రక్టర్లు, చెఫ్లు, మ్యూజిక్ టీచర్లకు వీసా ఈజీగా దొరికే అవకాశం ఉంది. ఎంతమంది ఇండియన్ స్టూడెంట్లకు అయినా న్యూజిలాండ్లో ఎంట్రీ ఉంటుంది. చదువు పూర్తయిన తర్వాత 3 నుంచి 4 ఏండ్ల పాటు అక్కడే పనిచేసుకునే అవకాశం కల్పించనున్నారు. ఏటా వెయ్యి మంది యువతకు ‘వర్కింగ్ హాలిడే వీసా’ కింద న్యూజిలాండ్లో పర్యటిస్తూ పనిచేసుకునే అవకాశం లభిస్తుంది.
