హనుమకొండ, వెలుగు : గ్యాంగ్ స్టర్ నయీం చనిపోయి ఐదేండ్లవుతున్నా అతడి అనుచరుల ఆగడాలు మాత్రం కొనసాగుతూనే ఉన్నాయి. ముఖ్యంగా వరంగల్ఉమ్మడి జిల్లాలో వివాదాస్పద భూములపై కన్నేయడం, సెటిల్మెంట్లు చేస్తామంటూ దందాలకు దిగడం, లొంగని వారిని తుపాకులు, తల్వార్లతో బెదిరించడం కామనైపోయింది. అయితే వీరి వెనక అధికార పార్టీ నేతల హస్తం ఉన్నట్టు స్పష్టమవుతున్నది. వీరి అండ చూసుకుని గ్యాంగ్సభ్యులు మరింత రెచ్చిపోతున్నారు. ఈ క్రమంలో కొన్ని నెలల కింద కొంతమంది బాధితులు ధైర్యంగా బయటకు వచ్చి పోలీసులకు ఫిర్యాదు చేయడంతో పోలీసులు జులై 29న ఓ ముఠాను పట్టుకుని విచారణ మొదలుపెట్టారు. వారి ఎంక్వైరీలో విస్తుగొలిపే నిజాలు బయటపడుతున్నాయి. తీగ లాగితే డొంక కదిలినట్టు నయీం గ్యాంగ్తో భూదందాల్లో పాల్గొన్న అధికార పార్టీ నేతల పేర్లు ఒక్కొక్కటిగా బయటకు వస్తున్నాయి. ఇప్పటికీ ఇద్దరు టీఆర్ఎస్ నేతలను అరెస్ట్ చేయగా.. మరికొందరిపైనా యాక్షన్ తీసుకునేందుకు పోలీసులు రెడీ అవుతున్నారు.
మూడేండ్ల నుంచి దందా
రాష్ట్ర రాజధాని హైదరాబాద్తర్వాత అభివృద్ధికి అంత అవకాశం ఉన్న నగరం వరంగల్. ఓ వైపు రింగ్ రోడ్డు, మరోవైపు వివిధ పరిశ్రమలు, కంపెనీలు, విద్యాసంస్థలు, ఐటీ ఇండస్ట్రీ ఇలా అన్నీ ఇక్కడే ఏర్పాటవుతుండటంతో భూములకు డిమాండ్ పెరిగింది. ఒక్కసారిగా భూముల రేట్లు ఆకాశాన్నంటడం, ధరణి వెబ్సైట్లో దొర్లిన తప్పుల కారణంగా భూవివాదాలు ఎక్కువ కాగా ఇదే సందనుకుని సెటిల్మెంట్ గ్యాంగులు పెరిగిపోయాయి. ఈ క్రమంలోనే మూడేండ్ల కిందటే నయీం గ్యాంగ్లో పని చేసిన కొందరు ముఠాగా ఏర్పడి సెటిల్మెంట్లు మొదలుపెట్టారు. ములుగు జిల్లాలో పోలీస్ రిజర్వ్ఇన్స్పెక్టర్ గా పని చేస్తున్న సంపత్ కుమార్, నయీం గ్యాంగ్ లో పని చేసిన ముద్దసాని వేణుగోపాల్తో అధికార పార్టీ లీడర్, మొగుళ్లపల్లి మాజీ ఎంపీపీ మల్లయ్య, ఉమ్మడి జిల్లాకు చెందిన ఇంకొందరు నేతలు చేతులు కలిపారు. సెటిల్మెంట్లు, బెదిరింపుల సంగతి వేణుగోపాల్, ఇంకొంతమందితో కూడిన గ్యాంగ్ చూసుకుంటే..పోలీసులు, ఇతర ఆఫీసర్ల సపోర్ట్ ను కూడగట్టే పనిని ఆర్ఐ సంపత్కుమార్ చూసుకునేవారు. ఇక్కడ కూడా వర్కవుట్కాకపోతే మిగతా చోట్ల సెటిల్ చేసే పనిని అధికార పార్టీ లీడర్లు చూసుకునేవారు. ఇలా ఓ ప్లాన్ప్రకారం మూడేండ్ల నుంచి దందాలు, సెటిల్ మెంట్లు చేస్తూ రూ.కోట్లు సంపాదించారు. ఈ క్రమంలో వరంగల్ ఆరెపల్లి సమీపంలోని ఓ ల్యాండ్ విషయంలో బాధితుడిని తుపాకీ, తల్వార్లతో బెదిరించడంతో ఈ గ్యాంగ్బండారం బట్టబయలైంది.
అందరూ గులాబీ లీడర్లే..
రూ. కోట్ల విలువైన ల్యాండ్విషయంలో నయీం గ్యాంగ్, ఆర్ఐ సంపత్ తుపాకులతో బెదిరింపులకు దిగడంతో ఓ బాధితులు ధైర్యం చేసి హసన్పర్తి, కేయూ, హనుమకొండ పోలీస్స్టేషన్లలో కేసు పెట్టారు. మొత్తం10 మందిపై కేసు నమోదు చేసిన పోలీసులు జూలై 29న ఆరుగురిని అదుపులోకి తీసుకున్నారు. తర్వాత ఆగస్టు 20న ఏ2 అయిన ఆర్ఐ సంపత్ కుమార్, ఈ నెల 12న ఏ1 ముద్దసాని వేణుగోపాల్ ను అరెస్ట్ చేశారు. వారిచ్చిన సమాచారంతో ఏ3గా ఉన్న మాజీ ఎంపీపీ మల్లయ్యను, రెండు రోజుల కింద టీఆర్ఎస్ నల్లబెల్లి మండల అధ్యక్షుడు బానోత్సారంగపాణిని అరెస్ట్ చేశారు. వీరే కాకుండా ఓ జడ్పీటీసీ, హసన్పర్తి మండలం మల్లారెడ్డిపల్లికి చెందిన లీడర్, వరంగల్నగరం వర్ధన్నపేట నియోజకవర్గానికి చెందిన ఓ కార్పొరేటర్ భర్త, ఇంకొంతమంది టీఆర్ఎస్ నాయకులు కూడా నయీం గ్యాంగ్బాగోతాల్లో భాగం పంచుకున్నట్లు తెలిసింది.
మంత్రి, ప్రజాప్రతినిధి, ముగ్గురు ఎమ్మెల్యేలు
నయీం గ్యాంగ్తో ఉమ్మడి జిల్లాకు చెందిన అధికార పార్టీ నేతలు పర్సంటేజీలు మాట్లాడుకుని సపోర్ట్ చేస్తున్నారనే ప్రచారం జరుగుతోంది. ఈ గ్యాంగ్ బెదిరింపులతో కొంతమంది బాధితులు పోలీసులను ఆశ్రయించగా ఓ మంత్రితో పాటు సీఎంకు దగ్గరగా ఉండే ఓ ప్రజాప్రతినిధి, ఓ ముగ్గురు ఎమ్మెల్యేల సపోర్ట్చేయడంతో యాక్షన్ తీసుకోలేదనే ఆరోపణలు వినిపిస్తున్నాయి. కానీ ఓ బాధితుడు టాస్క్ఫోర్స్ తో పాటు వరంగల్ సీపీ దృష్టికి తీసుకెళ్లగా ఈ విషయం లీడర్లకు తెలియక సైలెన్స్ గా ఉన్నట్టు తెలిసింది. సీపీ వెంటనే ఆదేశాలివ్వడంతో పోలీసుల విచారణలో టీఆర్ఎస్ లీడర్ల పేర్లు బయటకు వచ్చాయి. అయితే ఆలస్యంగా గుర్తించిన సదరు లీడర్లు ఇప్పుడు కేసును నీరుగార్చే ప్రయత్నం చేస్తున్నట్లు తెలుస్తోంది. ఇందులో భాగంగానే మొదట అరెస్ట్ చేయడానికి ఓ లీడర్ దగ్గరకు వెళ్లగా ఆయన ముందస్తు బెయిల్తీసుకున్నారు. ఈయనతో పాటు భూపాలపల్లి నియోజకవర్గానికి చెందిన ఓ నేత, మంత్రి కలిసి టీఆర్ఎస్ లీడర్లను కేసు నుంచి తప్పించే ప్రయత్నం చేస్తున్నట్లు తెలిసింది.
నేతల్లో కంగారు
నయీం గ్యాంగ్కేసులో నిందితుల పేర్లు ఒక్కొక్కటిగా బయటపడుతుండగా.. ఆ బ్యాచ్తో సంబంధం ఉన్న నేతల్లో కంగారు మొదలైనట్లు తెలుస్తోంది. ఈ క్రమంలోనే ఎంక్వైరీలో తమ పేర్లు బయటకు రాకుండా లీడర్లను ప్రసన్నం చేసుకుంటున్నట్లు సమాచారం. ఇప్పటికే ముద్దసాని వేణుగోపాల్, ఆర్ఐ సంపత్కుమార్తో అంటకాగిన కొందరు నేతలు ఓ ఎమ్మెల్యే ను ఆశ్రయించి, తమ పేరు బయటకు రాకుండా చూడాలని వేడుకున్నట్లు తెలిసింది. దీంతో ఆయా నేతలు కూడా వారిని కాపాడేందుకు ఎంక్వైరీ ఆఫీసర్లపై ఒత్తిడి తెస్తునట్టు వినికిడి. కాగా ఉమ్మడి జిల్లా వ్యాప్తంగా ఈ గ్యాంగ్బాధితులు పదుల సంఖ్యలో ఉండగా.. అధికార పార్టీ నేతలు నిందితులుగా ఉండడంతో కేసు విచారణపై అనుమానాలు కలుగుతున్నాయి. ఇప్పటికే పార్టీ నేతలను తప్పించేందుకు ప్రయత్నాలు చేస్తుండగా.. ఆఫీసర్ల విచారణ పూర్తిగా సాగుతుందో.. లేదా మధ్యలోనే వీగుతుందో తెలియని పరిస్థితి నెలకొంది.