న్యూఢిల్లీ, వెలుగు: పెద్దపల్లి లోక్సభ సభ్యుడిగా ప్రమాణ స్వీకారం చేసిన గడ్డం వంశీకృష్ణకు కరెన్సీపై అంబేద్కర్ ఫొటో సాధన సమితి ఘనంగా సన్మానం చేసింది. మంగళవారం ఢిల్లీలో వంశీని సంస్థ జాతీయ అధ్యక్షుడు డాక్టర్ జెరిపోతుల పరశురాం కలిశారు. ఎంపీకి అంబేద్కర్ విగ్రహం అందజేసి సత్కరించారు. ఈ సందర్భంగా పరశురాం మాట్లాడుతూ.. అంబేద్కర్ ఆశయ సాధనే లక్ష్యంగా బడుగుబలహీన వర్గాల అభ్యున్నతి కోసం గడ్డం వంశీ కృషిచేస్తున్నారని తెలిపారు.
పెద్దపల్లి లోక్సభ సభ్యుడిగా ఆయన గెలుపొందడం చాలా సంతోషంగా ఉందన్నారు. కరెన్సీపై అంబేద్కర్ ఫొటో ముద్రించాలనే అంశంపై పార్లమెంటులో మాట్లాడాలని ఆయనకు వినతిపత్రం అందజేశామని తెలిపారు. ఇది న్యాయమైన డిమాండ్ అని, దీనికి కట్టుబడి ఉన్నట్టు ఎంపీ హామీ ఇచ్చారని పరశురాం చెప్పారు. ఈ కార్యక్రమంలో సమితి సాంస్కృతిక విభాగం జాతీయ కన్వీనర్ గట్టగల్ల సంజీవ, ఢిల్లీ ప్రెసిడెంట్ చంద్రహాస్ పాల్గొన్నారు.
