వాతావరణం చల్లగా ఉన్నా..ముసుర్లు పడుతున్నా... పిల్లల దగ్గర్నించి పెద్దోళ్ల వరకు సర్దో... దగ్గో వస్తూనే ఉంటుంది. ఆ టైంలో నాలుకకు ఏది తిన్నా రుచించదు. అలాంటప్పుడు అన్నం, టిఫిన్లలో కారం వేసుకుని తింటే నోటికి మంచిగా అనిపిస్తుంది. అలాంటి కారాన్ని ఎన్నోరకాలుగా చేసుకోవచ్చు. అందులో కొన్ని వెరైటీస్ పొడులను ఎలా తయారు చేయాలో ఇప్పుడు తెలుపుకుందాం. . .
ఎల్లిపాయ కారంపొడి తయారీకి కావలసినవి
- ఎండుమిర్చి: పదిహేను
- మినప్పప్పు: ఒక టేబుల్ స్పూన్
- పెసరపప్పు: ఒక టేబుల్ స్పూన్
- శెనగపప్పు: ఒక టేబుల్ స్పూన్
- అవిసె గింజలు (కావాలనుకుంటే) : ఒక టీ స్పూన్
- పసుపు: అర టీ స్పూన్
- మిరియాలు: అర టీ స్పూన్
- జీలకర్ర: పావు టీ స్పూన్
- ఉప్పు: తగినంత
- వెల్లుల్లి గడ్డలు: రెండు
- కరివేపాకు: రెండు రెమ్మలు
తయారీవిధానం: స్టవ్ పై పాన్ పెట్టి శెనగపప్పు, మినప్పప్పు, పెసరపప్పు, ఎండుమిర్చి, అవిసె గింజలు. మిరియాలు, జీలకర్రలను విడివిడిగా వేగించాలి. స్టవ్ ఆఫ్ చేశాక, వేడిగా ఉన్న గిన్నెలో కరివేపాకు వేస్తే.. అది కొద్దిగా వేగుతుంది. తర్వాత మిక్సీలో ఎండుమిర్చి తప్ప... వేగించుకున్న మిగతా అన్ని పదార్థాలను వేసి గ్రైండ్ చేయాలి. అది పొడి కాగానే కరివేపాకు, ఎండుమిర్చి ముక్కలను వేసి మళ్లీ ఒక రౌండ్ తిప్పాలి. అందులో వెల్లుల్లి రెబ్బలు, ఉప్పు, పసుపు వేసి గ్రైండ్ చేయాలి. తర్వాత పొడిని గిన్నెలోకి తీసుకొని బాగా కలపాలి. వేడివేడి అన్నంలో ఈ ఎల్లిపాయ కారం కలుపుకుని తింటే... రుచి అదిరిపోతుంది.
ఎండుకొబ్బరితో కారంతయారీకి కావాల్సినవి
- ఎండు కొబ్బరి పొడి: రెండు కప్పులు
- ఎండుమిర్చి: ఆరు
- వెల్లుల్లి రెబ్బలు: నాలుగు
- ఉప్పు: తగినంత
- ధనియాలు: రెండు టీ స్పూన్లు
- జీలకర్ర: అర టీ స్పూన్
- పసుపు: చిటికెడు
తయారీ విధానం: ఎండుమిర్చి, జీలకర్ర, ధనియాలను విడివిడిగా వేగించాలి. తర్వాత మిక్సీ గిన్నెలో ఎండుమిర్చి, ఉప్పు వేసి గ్రైండ్ చేయాలి. ఆపైన వెల్లుల్లి రెబ్బలు, జీలకర్ర, పసుపు, ధనియాలు, కొబ్బరి పొడి వేసి మళ్లీ గ్రైండ్ చేయాలి. వేడి వేడి అన్నం లేదా టిఫిన్లలో కొబ్బరి కారం రుచిగా ఉంటుంది.
