65 సంవత్సరాలు నిండిన వయోవృద్ధులకు ఓల్డ్ఏజ్ పెన్షన్ అనుమతిస్తామని లోగడ ప్రభుత్వం ప్రకటించింది. 4 సంవత్సరాలు గడిచిపోయినప్పటికీ నేటికీ ఆఫ్లైన్ పద్దతి ద్వారా ఎంపీడీఓ కు సమర్పించుకొని డీఆర్డీఓ లో ఆన్లైన్ చేయబడిన అభ్యర్థనలకు ఆమోద ముద్ర వేయబడక పెండింగ్లో ఉన్నాయి. 2022 సెప్టెంబర్లో 57 సంవత్సరాలు నిండి ఆన్ లైన్లో అభ్యర్థనలు పెట్టుకొని ఉన్నవారికి పెన్షన్ మంజూరు గావించారు. 65 ఏండ్ల వారిని ప్రభుత్వం మర్చిపోయింది. న్యాయంగా 65 ఏండ్లు దాటిన వారికి ముందు అనుమతించి, ఆపైన 57 ఏండ్ల వారికి పెన్షన్ ఆమోదించాలి. లేదా ఇరువురికీ ఒకేసారి ఆమోదం తెల్పినా బాగుండేది. అలా చేయలేదు.
57 ఏండ్ల వారికి పెన్షన్ మంజూరు చేసి, 65 ఏండ్లు పై బడ్డవారికి ప్రభుత్వం గుండు సున్నా పెట్టింది. ప్రభుత్వం ఇలాంటి తప్పిదం చేయడం సిగ్గుచేటు. 65 ఏండ్ల పై బడ్డ వారు పౌరులు కారా? ఓటర్లు కారా? రాష్ట్రవ్యాప్తంగా అన్ని మండలాల్లో అప్లికేషన్లు పెండింగ్లోనే ఉన్నాయి. వారంతా బాధపడుతున్నారు. ప్రభుత్వం ఈ విషయం గమనించి అర్హులైన వారి అప్లికేషన్లను వెంటనే పరిగణనలోకి తీసుకొని న్యాయం చేయాలి. ప్రభుత్వమే ప్రజలు, ప్రజలే ప్రభుత్వం. ఈ యదార్థామును పరిశీలించి అర్హులైన దరఖాస్తుదారులందరికీ ఈ నెలలోనే పెన్షన్ మంజూరు చేయాలని ఆశిస్తున్నాం. - నిమ్మల రాఘవ రెడ్డి, జైనాథ్ మండలం, ఆదిలాబాద్ జిల్లా
