పుర్రెకో బుద్ధి, జిహ్వకో రుచి అన్నారు పెద్దలు. అందుకు తగ్గట్లుగానే ఇప్పుడు రెస్టారెంట్లు సరికొత్త థీమ్ తో జనాన్ని ఆకట్టుకుంటున్నారు. రకరకాల టేస్టీ ఫుడ్ తో కస్టమర్ల టేస్ట్ బడ్స్ కు శాటిస్ఫై చేస్తున్నాయి. ఇదే కోవలో కాశ్మీర్ లో ఓ హోటల్ నిర్వాహకులు గ్లాస్ ఇగ్లూ రెస్టారెంట్ ఏర్పాటు చేశారు. ప్రకృతి సౌందర్యాన్ని ఆస్వాదిస్తూ ఫుడ్ ఎంజాయ్ చేసేలా దీన్ని నిర్మించారు.
ఉత్తర కాశ్మీర్ లోని బారాముల్లా జిల్లా గుల్‌మార్గ్‌లో ఉన్న కొలాహోయ్ గ్రీన్ హైట్స్ హోటల్ మేనేజ్ మెంట్ కొన్నాళ్ల క్రితం ఈ గ్లాస్ వాల్ రెస్టారెంట్ నిర్మించింది. మంచు మధ్యలో ఏర్పాటు చేసిన ఈ ఆసియాలో అతిపెద్ద స్నో ఇగ్లూ రెస్టారెంట్ పర్యాటకులను విపరీతంగా ఆకర్షిస్తోంది. టూరిజాన్ని ప్రోత్సహించేందుకు తాము కొత్త మార్గాలను అన్వేషిస్తుంటామని హోటల్ జనరల్ మేనేజర్ హమీద్ మసూది స్పష్టం చేశారు. అందులో భాగంగానే ఫిన్లాండ్ సహకారంతో ఈ ఇగ్లూ గ్లాస్ కాన్సెప్ట్‌ తెరపైకి తెచ్చినట్లు చెప్పారు.
ఇగ్లూ రెస్టారెంట్ అద్భుతంగా ఉందని, ప్రతి ఒక్కరూ ఒక్కసారైనా ఈ గ్లాస్ ఇగ్లూను విజిట్ చేయాలని టూరిస్టులు అంటున్నారు. ఇగ్లూ లోపల కూర్చొని, ప్రకృతి సౌందర్యాన్ని చూస్తూ.. లంచ్ లేదా డిన్నర్‌ చేయడం చెప్పలేని అనుభూతిని కలిగించిందని ఆనందం వ్యక్తం చేశారు. ఈ గ్లాస్ ఇగ్లూను చూసేందుకు సెల్ఫీలు దిగేందుకు చాలా మంది వస్తున్నారు. కాసేపు అందులో కూర్చొని, చుట్టూ ఉన్న ప్రకృతిని చూస్తూ ఎంజాయ్ చేసి వెళ్తున్నారు.
