- న్యూయార్క్లో ఓ కంపెనీ పబ్లిసిటీ స్టంట్
మెరిసేదంతా బంగారం కాదనే సామెత కొన్నిసార్లు నిజం కాకపోవచ్చని న్యూయార్క్ వాసులు అంటున్నరు. ముఖ్యంగా సిటీ సెంట్రల్ పార్క్ చుట్టుపక్కల ఉండేటోళ్లు ఇదే చెప్తున్నరు. పార్క్లో ఓ భారీ బంగారం క్యూబ్ కనిపించడమే దీనికి కారణం. పార్క్లో ఓ చోట కనిపించిన ఈ క్యూబ్ అచ్చంగా స్వచ్ఛమైన బంగారమేనట. ఏకంగా 186 కిలోల 24 క్యారెట్ల బంగారాన్ని ఉపయోగించి దీనిని తయారు చేశారట. దీని విలువ 11.7 మిలియన్ల అమెరికన్ డాలర్లు( మన రూపాయల్లో 87 కోట్ల పై మాటే). నాలుగైదు గ్రాముల బరువున్న నగలను కూడా అద్దాలలో పెట్టి తాళమేసే ఈ రోజుల్లో అంతపెద్ద బంగారు ముద్దను ఇలా పార్కులో ఎందుకేశారు.. ఎవరన్నా ఎత్తుకెళితే ఎట్లా అని అక్కడి జనం అనుకున్నరట. అయితే, క్యూబ్ను ఎప్పటికప్పుడు గమనిస్తూ సెక్యూరిటీ సిబ్బంది దగ్గర్లోనే ఉన్నారు. కొత్తగా లాంచ్చేయబోయే క్రిప్టో కాయిన్ ప్రచారం కోసం బంగారు క్యూబ్ను పార్క్లో పెట్టామని.. క్యూబ్ను తయారుచేసిన జర్మనీ ఆర్టిస్ట్ నిక్లస్ కాస్టెల్లో చెప్పారు. ఈ ప్రదర్శన కేవలం ఆ ఒక్క రోజుకే పరిమితం చేశారు.
