కరోనా మహమ్మారి ఈ తాతయ్య ప్రేమ ముందు ఓడిపోయింది. కొద్ది రోజుల క్రితమే పుట్టిన తన మనవరాలిని మనసారా దీవించకుండా అడ్డుకోలేకపోయింది. సోషల్ డిస్టెన్స్ అనే అడ్డుగోడను పెట్టగలిగిందే కానీ.. ప్రేమగా ఆ చిట్టితల్లిని చూసి గుండెల్లోంచి వచ్చే చిరునవ్వులకు ఏ గోడలు పెట్టలేకపోయింది. కరోనాతో ఎక్కడికక్కడ అంతా లాక్ డౌన్ అయిపోయినా ఓ వృద్ధుడు ఒంటరిగా రోజూ ఆరున్నర కిలోమీటర్ల దూరం నడిచి.. కిటికీలో నుంచి చూసి సంబరంగా వెనక్కి వెళ్తున్నాడు. అమెరికాలోని మిషిగాన్ లో జరిగిన ఈ ఘటన సోషల్ మీడియాలో వైరల్ అవుతోంది.
మా నాన్నను చూస్తే చాలా బాధేస్తోంది
మిషిగాన్ లోని జీలాండ్ కు చెందిన జోష్ గిల్లెట్ అనే యువకుడికి ఇటీవల కూతురు పుట్టింది. అతడి భార్యకు డెలివరీ అయిన తర్వాత కొద్ది రోజులకే కరనా వైరస్ విజృంభించడంతో ఎక్కడి వాళ్లు అక్కడే నిలిచిపోవాల్సి వచ్చింది. జోష్ ఉంటున్న ప్రాంతానికి ఆరున్నర కిలోమీటర్ల దూరంలో అతడి తండ్రి ఉంటున్నాడు. అయితే ఆ పసికందును లాక్ డౌన్ కు ముందు ఒకటి రెండు సార్లు ఎత్తుకుని లాలించిన జోష్ తండ్రి ఆ చిన్నారిని చూడకుండా ఉండలేకపోతున్నాడు. దీంతో ఆ చిట్టితల్లిని ఒక్కసారైనా అలా చూసి వెళ్లాలన్న తపనతో లాక్ డౌన్ లోనూ ఆరున్నర కిలోమీటర్ల దూరం కాలి నడకన వచ్చి వెళ్తున్నాడు. కిటికీ అద్దంలో నుంచి తన బిడ్డను చూసి వెళ్తున్న తండ్రిని చూస్తే చాలా బాధేస్తోందని, జీవితంలోనే ఇది తాను మర్చిపోలేని, అయితే ఇది టెంపరరీ అని తనకు తెలిసినా బాధ ఆపుకోలేకపోతున్నానని అంటూ ఇన్ స్టాగ్రామ్ లో ఫొటోతో పోస్ట్ చేశాడు. ఇది రోజువారీగా జరుగుతోందని, కానీ ఆయన తన బిడ్డను ఎతుకోలేకపోవడం తన హృదయాన్ని కలచి వేస్తోందని అన్నాడు జోష్. అయితే తన తండ్రి ఫేస్ లో చెప్పలేనంత ఆనందం చూస్తే ఆ బాధపోతోందని చెప్పాడు.
మనందరికీ స్ఫూర్తి…
ఈ తాతయ్య తన మనవరాలిపై ఎంత ప్రేమ ఉన్నా లోపలికి వచ్చి ఎత్తుకోకుండా బయట ఆగిపోవడాన్ని అందరూ స్ఫూర్తి పొందాల్సిన అవసరం ఉందని జోష్ అన్నాడు. తన బిడ్డల మంచి కోసం తాను బయటే ఆగిపోగలిగినప్పుడు మనందరం కూడా ఇంట్లో నుంచి బయటకు వెళ్లకుండా ఉండాలని పిలుపునిచ్చాడు. మనం ప్రేమించే వాళ్ల కోసం, డాక్టర్ల కోసం, టీచర్ల కోసం, పిల్లల కోసం అందరం ఇళ్లకే పరిమితమవుదాం అంటూ తన పోస్ట్ ముగించాడు.
కంటతడి పెట్టిస్తోంది…
ఈ పోస్ట్ ఇన్ స్టాగ్రామ్ లో వైరల్ అవుతోంది. ఇప్పటి వరకు దాదాపు ఐదు వేల మంది ఈ ఫొటోను లైక్ చేశారు. బ్యూటిఫుల్ అంటూ కొందరు కామెంట్ చేస్తే, బాగా చెప్పారు.. మీ చిన్నారి, అందమైన ఫ్యామిలీకి ఆల్ ద బెస్ట్ అని మరికొందరు కామెంట్లు చేశారు. ఈ పొటో తన కంటతడి పెట్టించిందని మరో నెటిజన్ కామెంట్ పెట్టాడు.