న్యూఢిల్లీ : వస్తు సేవల పన్ను (జీఎస్టీ) వసూళ్లు డిసెంబరులో 10 శాతం పెరిగి దాదాపు రూ. 1.64 లక్షల కోట్లకు చేరాయి. 2022 డిసెంబరులో వసూళ్ల విలువ రూ. 1.49 లక్షల కోట్లుగా రికార్డయింది. గత ఏడాది ఏప్రిల్–-డిసెంబర్ స్థూల జీఎస్టీ వసూళ్లు 12 శాతం వృద్ధిని సాధించి రూ. 14.97 లక్షల కోట్లకు చేరుకున్నాయి. అంతకు ముందు సంవత్సరం ఇదే కాలంలో రూ. 13.40 లక్షల కోట్లు వసూలయ్యాయని కేంద్ర ఆర్థిక మంత్రిత్వ శాఖ ఒక ప్రకటనలో తెలిపింది.
ఈ ఏడాది మొదటి తొమ్మిది నెలల కాలంలో సగటు నెలవారీ స్థూల జీఎస్టీ వసూళ్లు రూ. 1.66 లక్షల కోట్లు ఉన్నాయి. 2023 ఆర్థిక సంవత్సరంలో నమోదైన రూ. 1.49 లక్షల కోట్ల సగటుతో పోలిస్తే ఈ ఏడాది 12 శాతం వృద్ధిని సూచిస్తోంది. డిసెంబర్, 2023 నెలలో సేకరించిన స్థూల జీఎస్టీ రాబడి రూ. 1,64,882 కోట్లు కాగా, ఇందులో సీజీఎస్టీ రూ. 30,443 కోట్లు, ఎస్జీఎస్టీ రూ. 37,935 కోట్లు, ఐజీఎస్టీ రూ. 84,255 కోట్లు (దిగుమతిపై సేకరించిన రూ. 41,534 కోట్లతో కలిపి) సెస్ రూ. 12,249 కోట్లు (వస్తువుల దిగుమతిపై వసూలు చేసిన రూ. 1,079 కోట్లతో సహా) ఉన్నాయి. ఈ ఏడాది ఇప్పటి వరకు ఏడు నెలలపాటు జీఎస్టీ వసూళ్లు రూ. 1.60 లక్షల కోట్లకుపైగా ఉన్నాయి.
