ఒక్కొక్కరుగా బయటికొస్తరు
పార్టీని చక్కదిద్దే టైమ్నాయకత్వానికి లేదు
త్వరలో కొత్త పార్టీ : ఆజాద్
న్యూఢిల్లీ : రోగంతో బాధపడుతున్న కాంగ్రెస్ పార్టీకి డాక్టర్లు కాకుండా కాంపౌండర్లు మందులిస్తున్నారని ఆ పార్టీ మాజీ నేత గులాంనబీ ఆజాద్ అన్నారు. పార్టీని చక్కదిద్దే టైమ్ కూడా కాంగ్రెస్ నాయకత్వానికి లేదని ఆయన విమర్శించారు. రాష్ట్రాల్లో కాంగ్రెస్కు నాయకత్వం వహిస్తున్న వారు పార్టీ సభ్యులు కాంగ్రెస్ను వీడేలా ప్రవర్తిస్తున్నారని ఆరోపించారు. ఆ పార్టీకి ఇక తాను బెస్ట్ విషెస్ మాత్రమే చెప్పగలనని పేర్కొన్నారు. సోమవారం ఢిల్లీలోని తన నివాసంలో మీడియాతో ఆజాద్ మాట్లాడారు. ‘‘కాంగ్రెస్ పార్టీ పునాది చాలా బలహీనంగా మారింది. పార్టీ ఎప్పుడైనా కూలవచ్చు. అందువల్లే పార్టీని వీడాలని కొంతమంది లీడర్లతో పాటు నేను కూడా నిర్ణయించుకున్నా. కాంగ్రెస్లో గుమాస్తాగిరి చేస్తూ, ఇతరులకు వ్యతిరేకంగా కుట్రలు చేసేవాళ్లు ఎక్కువయ్యారు’’ అని ఆయన పేర్కొన్నారు. కాంగ్రెస్ నేత రాహుల్ గాంధీపైనా ఆయన తన విమర్శలు కొనసాగించారు. రాజకీయాలపై రాహుల్కు ఆసక్తి లేనట్లు ఉందని తెలిపారు. ఆయనను లీడర్గా మార్చేందుకు చాలాసార్లు ప్రయత్నించినా లాభం లేకపోయిందని వెల్లడించారు. తన డీఎన్ఏను ప్రశ్నించిన వారి డీఎన్ఏను ఆజాద్ తిరిగి ప్రశ్నించారు.
బీజేపీలో చేరితే నాకేంటి?
బీజేపీలో తాను చేరబోనని ఆజాద్ స్పష్టంచేశారు. బీజేపీలో చేరితే కాశ్మీర్లో తనకు ఉపయోగం ఉండబోదన్నారు. జమ్మూకాశ్మీర్లో ఎప్పుడైనా ఎన్నికలు వచ్చే చాన్సుందని, త్వరలో తాను కొత్త పార్టీ పెడతానని వెల్లడించారు. ‘‘బీజేపీకి ప్రత్యేక రాజ్యాంగం ఉంది. ఆ పార్టీ కీలుబొమ్మలే నాపై తప్పుడు ప్రచారం చేస్తున్నరు. నాకు వ్యతిరేకంగా కాంగ్రెస్ చేస్తున్న దుష్ప్రచారమే ఇది. కాశ్మీర్లోని ఇతర పార్టీలతో మేం చేతులు కలపవచ్చు” అని ఆజాద్ చెప్పారు. కాగా, తమపై ఆజాద్ చేసిన విమర్శలను కాంగ్రెస్ పార్టీ తిప్పికొట్టింది. కాంగ్రెస్ను ఆజాద్ మోసం చేశారని ఆరోపించింది. అంతేకాకుండా తనును తాను ఆజాద్ దిగజార్చుకున్నారని విమర్శించింది. ఈ మేరకు కాంగ్రెస్ నేత జైరాం రమేశ్ ట్వీట్ చేశారు.
మోడీ కఠినాత్ముడనుకున్నా.. కానీ మానవత్వం చూపారు
ప్రధాని నరేంద్ర మోడీపై ఆజాద్ ప్రశంసల వర్షం కురిపించారు. ‘‘నేను జమ్మూకాశ్మీర్ సీఎంగా ఉన్నపుడు కాశ్మీర్లో ఓ గుజరాతీ బస్సులో గ్రనేడ్పేలి, పదుల సంఖ్యలో గాయపడ్డారు. ఆ సమయంలో మోడీ గుజరాత్ సీఎంగా ఉన్నారు. పేలుడు జరిగిన తర్వాత ఆయన నాకు ఫోన్ చేసి పరిస్థితిని అడిగి తెలుసుకున్నారు. ఆయన కఠినాత్ముడు కాదు, మానవత్వం ఉన్న మనిషి అని నాకప్పుడే అనిపించింది” అని ఆజాద్ గుర్తు చేసుకున్నారు.
