- కరీంనగర్ జిల్లాలో ఓ ఆర్ఎంపీ వినూత్న నిరసన
- కుక్కల బెడద నివారించాలని వినతి
కొత్తపల్లి, వెలుగు : కరీంనగర్ జిల్లా కొత్తపల్లి మున్సిపాలిటీ ప్రజలను కుక్కల బారి నుంచి కాపాడాలని ఎన్నిసార్లు చెప్పినా పట్టించుకోకపోవడంతో ఓ వ్యక్తి వినూత్నంగా నిరసన తెలిపాడు. కొత్తపల్లికి చెందిన ఓ ఆర్ఎంపీ డాక్టర్ అజీజొద్దీన్ సోమవారం చనిపోయిన కోడిని తీసుకెళ్లి కమిషనర్ చాంబర్ దర్వాజకు వేలాడదీశాడు. మంగళవారం ఉదయం సిబ్బంది వచ్చి కోడిని తొలగించారు.
అజీజొద్దీన్ మాట్లాడుతూ కొత్తపల్లి మున్సిపాలిటీలో ఐదు వేల జనాభాకు ఐదు వందల వీధికుక్కలున్నాయని, బండ్ల వెంట పడడం, రోడ్ల వెంట వచ్చేవారిని, చిన్న పిల్లలను, జంతువులను కరుస్తుండడంతో ప్రశాంతంగా తిరగలేకపోతున్నామన్నారు. మూడేండ్ల కింద మేకను చంపినప్పటి నుంచి కంప్లయింట్స్ఇస్తూ వస్తున్నానని, కానీ, మున్సిపల్అధికారులు పట్టించుకోవడం లేదన్నారు. గతంలో ఓ పిచ్చికుక్క పలువురిపై దాడి చేయగా స్థానికులు చంపడంతో కేసులు నమోదు చేశారని, దీంతో నిబంధనల మేరకే కుక్కల బారి నుంచి కాపాడాలని అభ్యర్థిస్తున్నా ఎలాంటి చర్యలు లేవన్నారు.
ఏడాదిన్నర కింద ఓ చిన్నారిని తీవ్రంగా గాయపరిచాయని, అప్పటి నుంచి తల్లిదండ్రులను పిల్లలను బయటకు పంపడం లేదన్నారు. మున్సిపల్లో కుక్కలను పట్టుకోవడానికి తీర్మానం చేసినా కొన్ని కారణాలతో విరమించుకున్నారన్నారు. మున్సిపల్ ఆఫీసులోనే 20 వరకు కుక్కలున్నాయన్నారు. సోమవారం ఓ కోడిని చంపేశాయని, దాన్ని తీసుకుని కమీషనర్కు చూపిస్తే పెద్దగా స్పందించలేదన్నారు. అందుకే నిరసనగా ఆయన ఛాంబర్దర్వాజకు కట్టి వచ్చానని చెప్పారు.
పశు వైద్యాధికారులు స్పందించట్లేదు
ఈ విషయమై మున్సిపల్కమిషనర్ కె.వేణుమాధవ్ను వివరణ కోరగా మున్సిపాలిటీలో కుక్కల బెడద ఉన్న మాట వాస్తవమేనని, వాటి నియంత్రణ కోసం స్టెరిలైజేషన్ చేయాలని ఆరు నెలలుగా జిల్లా పశువైద్యాధికారితో మాట్లాడుతున్నామన్నారు. స్పెషల్ క్యాంప్పెట్టి బెడద తగ్గిస్తామని చెప్పినా ఇంతవరకు ఏమీ చేయలేదన్నారు.
